Uthi liphume nobovu ngokuvela kwemfihlo
Uthi wethuleke umthwalo onzima uBabes Wodumo
UTHI liphume nobovu ngokuvela kwamanyala abegilwa yisoka lakhe, elinguMandla "Mampintsha" Maphumulo, limhlukumeza kodwa yena efihla ngoba elivikela uBongekile "Babes Wodumo" Simelane.
Leli phephandaba livezelwe lezi zindaba nguMnu Knowledge Simelane, okhulumela umndeni wakwaSimelane, ngemuva kokuba beqede ukukhuluma nayo le ntokazi ifika iphuma eGoli.
Ithumba ngokuhlukunyezwa kukaBabes libhoboke kwiMetro FM, ohlelweni olwethulwa nguMasechaba Ndlovu noMo Flava ngoLwesihlanu olwedlule.
UMnu Simelane uveze ukuthi njengomndeni sebekhulumile noBabes, wabatshela ukuthi ujabulile ngakho konke okuvelile ngoba konke kuyiqiniso.
“Siqeda ukukhuluma naye umntwana futhi ujabule kakhulu ngalokhu okuvelile ngesonto eledlule. Uthi wethuleke umthwalo onzima obusemahlombe akhe kwazise ubesaba ukukhuluma ngale nto sonke lesi sikhathi ngoba evikela ubudlelwano babo (noMampintsha)," kusho uMnu Simelane.
Uthe njengamanje balindele ukuzwa kuyena uBabes ukuthi yiziphi izinyathelo zokumvikela okumele zithathwe, okuyilapho bezobe sebemeseka khona. “Uphinde waveza ukuthi yize ebengakulindele ukukhuluma ngalolu daba kulolu hlelo, kodwa konke okukhulunywe nguMasechaba kuyiqiniso angeke aliphikise,” kusho uMnu Simelane.
Kulolu hlelo kuvele ukuthi uMampintsha ubehlukumeza uBabes ngokumshaya kanti kuthiwa kukhona nesikhathi lapho embhambabule khona waze wamphoqoza umlenze. Bheka ekhasini 4 no-21. nonhlakaniphos@ilanganews. co.za