Usecele izeluleko kubefundisi
Umndeni uthi usafuna ukuzwa uhlangothi lukaBabes
USEKHALE kubefundisi baseThekwini, uMandla "Mampintsha" Maphumulo ngodaba lokungaboni ngasolinye nesinqandamathe sakhe esingaconsi kubalandeli baso, uBongekile "Babes Wodumo" Simelane.
ILANGA lithole ngemithombo yalo engashayi eceleni ukuthi abefundisi abadumile baseThekwini sebeke bazama ukubonana noMbhishobhi Welcome Simelane, we-Apostolic Faith Mission, onguyise kaBabes, kodwa ugcine ebonane noPastor Sthembiso Zondo ( osesithombeni).
Kuthiwa uPastor Zondo ubethunywe nguMampintsha ukuba ayocela abakwaSimelane bamvumele akwazi ukuxoxa nabo ngalolu daba. Leli phephandaba lihabule ngemithombo yalo ukuthi uMbhishobhi Simelane - onegatsha eliseMargate - uqale ngokuthola ucingo obeluvela kuMbhishobhi Vusi Dube we-Ethekwini Community Church (ECC), ecela ukubonana naye ngoMsombuluko badingide lolu daba olungundabizekwayo.
Kuthiwa kabakwazanga ukubonana ngenxa yezimo ezithile, okuthe ngoLwesibili, uMbhishobhi Simelane wavakashelwa nguPastor Zondo, ongumeluleki nomethuli wezinkulumo ezakhayo.
UPastor Zondo kuthiwa uthe uthunywe nguMampintsha ukuba ayomcelela uxolo emndenini wakwaSimelane.
“Uveze ukuthi uMampintsha ukhathazekile ngalezi zindaba ezisabalele iNingizimu Afrika yonke zokuthi ubehlukumeza isinqandamathe sakhe, uBabes.
Ucele ukuba kuboniswane, kungavunyelwa ukuba uSathane angene phakathi kwale mindeni,” kusho umthombo.
Okhulumela lo mndeni, uyise omdala kaBabes, uMnu Knowledge Simelane, uvumile ukuthi uMbhishobhi Simelane, uke wathola ucingo kuMfu Dube ecela ukumbona kodwa bagcina bengabonananga. “Kuliqiniso nokuthi uPastor Zondo ufikile ethi uthunywe nguMampintsha ukuba azocela uxolo nokuthi imindeni ike ihlale phansi ikhulume.
"Okwamanje singacacisa nje ukuthi kasikamniki impendulo kepha silinde ukuba siqale sibe nomhlangano naye uBabes sizwe kuyena ukuthi kwenzekani nokuthi ufuna ukuthatha siphi isinqumo,” kusho uMnu Simelane.
UPastor Zondo uvumile ukuthi uMampintsha ufikile kuyena eyocela izeluleko, waveza nokuthi kube wumqondo wakhe ukuba kuke kuqale kuhlalwe phansi nabantu abadala kuxoxwe.
“Yena ulimele kakhulu ngale nto eyenzekayo. Ngibe sengimeluleka ngokuthi kungcono siqale siyikhulume nabantu abadala le nto, sibone ukuthi kungahlalwa yini phansi kulungiswe lesi simo,” kusho uPastor Zondo.
Ethintwa uMampintsha, ucingo lwakhe belukhala lungabanjwa lwagcina luvaliwe. Ucingo lukaMbhishobhi Dube beluvaliwe.