WESULILE UMAHUMAPELO
KUSHAYISANE izinkulumo kushiya uMnu Supra Mahumapelo esikhundleni sokuba ngundunankulu waseNorth West.
UMnu Mahumapelo bese kunesikhathi kunemibiko ngokwesula kwakhe kulesi sikhundla emuva kwemibhikisho eyahlukene kulesiya sifundazwe, eminye yayo ebihambisana nodlame nokucekelwa phansi kwempahla.
UMnu Mahumapelo ungomunye wabaholi abebehamba phambili ngokweseka uMnu Jacob Zuma obengumengameli waseNingizimu Afrika, futhi weseke uDkt Nkosazana DlaminiZuma ngaphambi kwengqungquthela yokukhetha ubuholi beAfrican National Congress (ANC) ebiseNasrec, eGoli ngoZibandlela (December) nyakenye.
Izolo ngoLwesithathu uMnu Mahumapelo esigcawini sabezindaba ekomkhulu le-ANC eLuthuli House, eGoli, umemezele ukuthi uthatha umhlalaphansi singakashayi isikhathi.
Utshele abezindaba ukuthi uthathe lesi sinqumo ukuze izinhlelo zikahulumeni ziqhubeke ngaphandle kokuphazamiseka. Uthe ngemuva kokucubungula zonke izinhlangothi, ukhethe ukuthatha umhlalaphansi singakashayi isikhathi.
UMnu Ace Magashule, ongunobhalala-jikelele we-ANC, usho okwehlukile kunoMnu Mahumapelo njengoba ekubeke kwacaca ukuthi (uMnu Mahumapelo) uyasula esikhundleni sokuba ngundunankulu.
Kuvele ukuthi uzoqhubeka abe ngusihlalo waleli qembu eNorth West. UNkk Jessie Duarte, oyisekela-nobhala kwi-ANC, uveze ukuthi okubalulekile manje eNorth West wukubuyisela isimo esiqondile futhi kubunjwe iqembu.
“Maziphele izinkundla zokuxhumana eziseka uhlangothi oluthile eqenjini. Sinobuholi obubodwa obuhlangene, obuqokwe ngoZibandlela, kumele sibuhloniphe, sibunike indawo yabo,” kusho uNkk Duarte.