SICHITHIWE ESOKWETHULA
ISICHITHILE isicelo sombuso iNkantolo yeMantshi yaseMlazi sokubiza iphoyisa obekulindeleke ukuba lethule ubufakazi balo izolo ngoLwesithathu ngenxa yokungabikhona kwesitatimende esibhaliwe ebesizosetshenziswa njengobufakazi.
Imantshi, uNkk Vinashri Govindarajulu, isichithile isicelo esifakwe ngumshushisi, uNkk Tanya Pretorius sokubiza iphoyisa ebelizothula ubufakazi mayelana nenombolo yocingo lukaMnu Nkanyiso Goda, ongummangalelwa, wesithathu ecaleni letulo lokuzama ukubulala uMnu Bhekani Shishane (46), waseMbumbulu ngoNhlaba (May) 2014.
Le nombolo ivela emarekhodini kamakhalekhukhwini kodwa uMnu Goda uthe akayazi nangesikhathi kwenzeka icala ubengenawo umakhalekhukhwini. Asolwa nabo nguMbuso Zulu ongummangele-lwa wokuqala - okuyimanje udonsa isigwebo seminyaka ewu-15 ecaleni lokubamba inkunzi kuhlonyiwe - nguMnu Nhlakanipho Mswane ongummangelelwa wesibili noNkk Sizakele Shishane ongowesine.
UMbuso noMnu Mswane bamelwe nguAdv Jeffery Khumalo, uMnu Goda umelwe nguMnu Manogaran Dass, kanti uNkk Shishane yena umelwe nguMnu Andile Dakela.
UMnu Shishane kuthiwa ushaywe walinyazwa nguMbuso, uMnu Mswane noMnu Goda ngesikhathi bephuma endaweni yokucima ukoma eSiphingo ngosuku lwesigameko.
Ushiywe eceleni komgwaqo oya eMbumbulu kucatshangwa ukuthi ufile. Kuvela ukuthi ukwazile ukugaqela emgwaqweni ukuze athole usizo. UMnu Dakela unxuse inkantolo ukuba isichithe isicelo sombuso sokubiza ufakazi ongasenzanga isitatimende emaphoyiseni.
Utshele imantshi ukuthi uma inkantolo isamukela isicelo sombuso, kuyobe kudeleleka amalungelo abamangalelwa.
“Ngiphakamisa ukuba inkantolo ingawuvumeli umbuso ubize iphoyisa ukwethula ubufakazi ngenombolo yocingo okusolwa ukuthi ekammangalelwa wesithathu ngoba uzama ukuchibiyela icala.
"Umbuso bekumele uhlele kahle ukuthi uzobiza baphi ofakazi futhi uzilungiselele ngaphambi kokuba icala liqale ukuqulwa enkantolo,” kusho uMnu Dakela.