UXOSHELWE UKUSUKUMELA
IBHANTSHI ligcwale umoya kowesilisa obesebenza esiqiwini esiseMkhonda, KwaNongoma - ILANGA elinalo igama lakhe - okuthiwa uxoshwe yimenenja yakhe emuva kokuyivulela icala lokubiza izisebenzi ngamakhafu....
ILANGA lithole ukuthi uMnu Nkosinathi Nyoni, umphelele umsebenzi ngoba evulele le menenja icala lokucwasa ngokwebala. Leli phephandaba libikile ngodaba lwakhe ngoLwesine olwedlule.
Uthe bese kuyinsakavukela umchilo wesidwaba ukubizwa ngezinkawu namakhafu... njalo uma bekhala ngamaholo nangendlela abaphethwe ngayo.
“Ngixoshelwe ukusukumela amalungelo ami. Ngibike lolu daba emaphoyiseni ngenxa yokuthi besihlukumezeka kakhulu, akekho umuntu onelungelo lokucwasa omunye ngokwebala.
"Ukuxakeka kwethu kakusho ukuthi kumele sihlukunyezwe, sibizwe ngamagama alumelayo uma sikhala ngezindlela zokusebenza. Umthetho kumele uqinise isandla emacaleni okucwasa ngokwebala ngoba athatheka kalula kanti abucayi,” kusho uMnu Nyoni.
UMnu Nkosikhona Ndabandaba oyikhansela kule ndawo, uthe: “Umphakathi ufuna ukubhikishela le menenja ukuze ikhishwe esikhundleni kubekwe enye. Sekulindwe imvume yasenkantolo esho ukuthi usuku lombhikisho lunini,” kusho uMnu Ndabandaba.
USihlalo weMunicipal and Allied Trade Union of South Africa (Matusa), uMnu Thulani Mathenjwa, uthi into eyenziwe yimenenja yalesi siqiwu kayivumelekile futhi iphambene nomthetho. “Kuyicala ukuxosha umuntu emsebenzi ngaphandle kwesizathu esizwakalayo.
"Umuntu owehlelwe yilokhu kumele aye emnyangweni wezisebenzi ayibike le menenja, athole ummeli ukuze udaba lwakhe luzoba nesisindo futhi lusukunyelwe ngokushesha,” kusho uMnu Mathenjwa.
Okhulumela amaphoyisa KwaZulu-Natal, uCol Thembeka Mbhele, uthi likhona icala lokucwasa ngokwebala elivulwe eMkhuze. Uthi amaphoyisa asaphenya, bekungakaboshwa muntu.