UFUNA IZIMPENDULO UMPHAKATHI NGEMIGWAQO
USUPHELELWE yithemba lokwakhelwa imigwaqo esesimeni esifanele umphakathi waKwaMgwili, eMzimkhulu, njengoba uthi intuthuko ihamba ngonyawo lonwabu kule ndawo.
ILANGA lithole ukuthi umphakathi wakule ndawo usola uMasipala wesiFunda iHarry Gwala, ngokuhudula izinyawo ekuthuthukiseni indawo yawo. Kuthiwa sekuphele iminyaka umphakathi uthenjiswa ukwakhelwa imigwaqo esesimeni esihle kodwa kungenzeki.
Ilungu lomphakathi elingathandanga ukudalulwa igama lalo, lithi: “Sesiside isikhathi sithenjiswa ukwakhelwa imigwaqo kodwa kuze kube yimanje lutho. Kuba yinkinga uma kukhona umuntu ogulayo odinga ukuphuthunyiswa esibhedlela. Sikhathele yizethembiso ezingafezwa.
“Okubuhlungu wukuthi imiphakathi ithenjiswa izulu nomhlaba uma kukhankaselwa ukhetho kodwa uma sesivotile, izidingo kazibe zisanakwa,” kusho leli lungu lomphakathi.
UNkz Nonsikelelo Mafa, oyikhansela lakule ndawo, uthe umasipala uyalwazi udaba lomgwaqo.
“Yinkulu inkinga esibhekene nayo kanti sesiside isikhathi imigwaqo inje. Umasipala uyalwazi lolu daba, uye ukhale ngokuthi imishini yokulungisa imigwaqo kayikho.
“Ngikhuluma nje umphakathi ubusuvuke umbhejazana ufuna ukubhikishela emahhovisi kamasipala uhambise uhlu lwezikhalo zawo.
“Ngicela ukuba umphakathi wehlise umoya ngoba umasipala uthe uzoboleka imishini ukuze kuzolungiswa le migwaqo,” kusho uNkz Mafa.
Ithintwa ngoLwesibili, iMeya yaseMzimkhulu, uMnu Mphuthumi Mpabanga, ithe isekilasini ngoba izobe ibhala inhlolokhono ngoLwesithathu. Icele ukuthintwa namhlanje ngoLwesine.