"Ababulali" bayazicanasela
Umndeni uthi kunzima ukwamukela isimo bengakaboshwa abasolwa
UYABALISA umndeni wakwaMthethwa, oLakeni, eMbazwane ngokucanasa kwabantu abasolwa ngokubulala ilungu lawo belisola ngokuwelisa izimoto ezebiwe emngceleni ohlukanisa iNingizimu Afrika neMozambique.
Umndeni kaMnu Siyabonga Mthethwa (29) okuthiwa ubulawe ngoMasingana (January) kulo nyaka, uthi ngeke ukuthole ukuphumula abasolwa besazicanasela.
Kulesi sigameko uMthethwa obengumakhenikha, ubulawe nomngani wakhe, uMnu Thobani Dlamini (28).
Kuthiwa ngaphambi kokuba babulawe, kuke kwaya iqulu labantu ebelihlomile kubo kaMnu Mthethwa liyomfuna, labaleka ngesikhathi umndeni ubiza amaphoyisa. UMnu Ben Masuluka, onguninalume kaMnu Mthethwa, uthi abasolwa bayaziwa, abanye babo babonakele nangelanga kufike iqulu liyofuna umufi.
Uthi abakufunayo nje, wukuba kwenzeke ubulungiswa. “Umshana ubengumuntu okhonze ukukhanda izimoto, ewusizo kakhulu nakwabanye abantu lapha endaweni ngokubakhandela izimoto zabo.
"Kuthe singazelele, kwafika inqwaba yabantu ihamba ngezimoto ivela eManguzi, ifune umshana ithi uyasoleka ekwebiweni kwezimoto ziweliswe umngcele.
"Obekhona ekhaya ushayele amaphoyisa, labaleka leli qulu. Yize libalekile, kodwa ukwazile ukuthatha izinombo zenye yezimoto abebehamba ngazo. Kudlule isikhathi umshana wathola ucingo komunye wabangani bakhe ecela ukuba ahambe naye kunomuntu afuna ayobalungisela imoto.
"Uvumile ngoba vele ukukhanda izimoto bekuyinto yakhe. Bathe befika nje lapho beya khona, bahlangatshezwa yiqulu labantu okubalwa nabo laba abebefike ekhaya bezomfuna.
Babashayile baya nabo ngasemngceleni. Baye nabo ehlathini thizeni lapho befike bababulala khona.
"Isihluku abasisebenzisile sibi kakhulu njengoba bebanqume imiqala, okusolisayo ukuthi bebesebenzisa umshini wo-kusika izihlahla. "Izidumbu zabo zize zatholakala emuva kwezinsuku ezimbili bebulewe,” kusho yena.
"Esikufunayo wukuba amaphoyisa asheshe ababophe bonke laba bantu ngoba side lesi sikhathi bezihambela sengathi kabakaze bakhiphe umphefumulo,” kusho yena.
UMnu Simon Mbuyazi onguyise kaMnu Dlamini, uthi nabo kabeneme neze ngokungaboshwa kwabasolwa ekubeni beboniwe ngesikhathi bethatha indodana yakhe.
“Siyafisa ukuba amaphoyisa asheshe abophe abasolwa ngoba baboniwe abantu abenze lokhu, kodwa kuthulekile.
"Ukuboshwa kwabasolwa yikhona okuzosithoba amanxeba ngoba kusenzima ukwamukela ukuthi basazicanasela namanje.
Siyasola ukuthi ngesikhathi behamba beyolungisa le moto, kukhona obexhumana nalaba ebatshela ukuthi sebekuphi nendawo,” kusho yena.
Okhulumela amaphoyisa KwaZulu-Natal, uCol Thembeka Mbhele, uthi ukhona umsolwa oyedwa oseboshiwe kulesi sigameko, ubhekene namacala amabili okubulala.
Uthi umsolwa uzovela kusasa ngoLwesihlanu eNkantolo yeMantshi eManguzi. LUYINKINGA OLOKWEBIWA KWEZIMOTO
Udaba lokuntshontshwa kwezimoto ziweliswe umngcele ohlukanisa iNingizimu Afrika neMozambique, luyindaba egudwini njengoba ILANGA selibike izikhathi eziningi ngalo.
Kuzokhumbuleka ukuthi ngo2016 libhalile ngesikhathi uMnu Nathi Nhleko evakashele kule ndawo ngesikhathi engungqongqoshe wamaphoyisa. Lapha umphakathi uphakamise ukuba kuphuthunyiswe umhlangano noMnu Jacob Zuma obengumengameli ngaleso sikhathi.
NgoMandulo (September) 2016, uyile uMnu Zuma, kwatshalwa namaphoyisa.
Emuva kwalokho umphakathi waseManguzi uke wavala umngcele ohlukanisa leli neMozambique, ukhala ngakho belu ukwebiwa kwezimoto ziweliswe. Kuze kwaya uMnu Fikile Mbalula ngesikhathi engungqongqoshe wamaphoyisa eyoncenga umphakathi ukuba uke uthi gozololo ukubhikisha.
Ekuqaleni kwale nyanga ILANGA libike ngokutholakala kwezimoto zikaMnu Vezokuhle Nala waMathole Funeral, seziyoweliswa umngcele kade zithathwe eMpangeni. Kuke kwaboshwa namaphoyisa abesolwa ngokubandakanyeka kulobu bugebengu.