Indida "ngothunjelwe" ingane ayikhulelwe
Batshele uyise wengane ukuthi ngeke bambulale
THUKA izanya umndeni wowesifazane waseVosloorus, eGauteng, okunezinsolo zokuthi uthunjwe ngabathile ngoba befuna ingane ayikhulelwe. ILANGA likhulume nomndeni kaNkz Mbalenhle Londiwe Mvungande (22), udaba lwakhe obeselusa- balele ezinkundleni zokuxhumana, lapho ebonakala eboshwe umlomo emkhukhwini kwehla izinyembezi ebusweni. Uninakhulu, uNkk Sizakele Sibisi ahlala naye futhi asebenza naye njengothishela enkulisa kuyona le ndawo, ubezwakala ekhuluma ukuthi uthuka ubala njengoba eqale wangakholwa nanokuthi ukhuluma neLANGA.
Uthe: “Ngawo umhla ka-15 aduke ngawo, ubelale evumelene noyise wengane yakhe ukuthi uzoyombambela ulayini emtholampilo bese eyamfonela uma sekuseduze.
“Kuthe ngabo-08:15 wabonwa ngomakhelwane ephuma endlini ekhuluma nocingo. Akekho owaziyo ukuthi ubekhuluma nobani nokuthi ubesephelelaphi,” kusho uninakhulu. Uthi kuze kwafika uyise wengane eyomlanda ngoba ethi kade emfonela engamtholi.
“Sibe sesiqalaza, sizama ukumthola ukuthi ushone ngaphi kwanhlanga zimuka nomoya. Ucingo lwakhe beseluvaliwe ngaleso sikhathi singamtholi. Kudingeke ukuba ngemuva kwezinsuku ezimbili sibike emaphoyiseni, okuyilapho sibe sesithola ukuthi ucingo lwakhe selu- vuliwe futhi.
“Uyise wengane yakhe ufonelwe ngowesifazane omtshele ukuthi makangakhathazeki, ngeke bambulale kepha bafuna ingane nje lena ayikhulelwe,” kusho yena.
UNkk Sibisi uthi uNkz Mvungande, ubesenamasonto awu-40 ezithwele kanti nodokotela bebethi yingane yentombazane.
“Bathe kuyise wengane bona bafuna ingane nje, kabafuni yena, bazomdedela uma esethole ingane.
“Lokhu kusikhathaza kakhulu ngoba kasazi ukuthi laba bantu bafuna ukwenzani ngengane nokuthi uma esebelethile bazomnakekela yini nokuthi bazomdedela ngempela yini,” kuqhuba yena.
Wale waphetha ukunika ILANGA inombolo kayise wengane, wathi njengamanje njengomndeni bakhathazekile ngendlela eyisimanga ngisho ukulala kabasakwazi.
Okhulumela amaphoyisa eGauteng, uLieutenant Colonel Lungelo Dlamini, uthi livuliwe icala lokuthunjwa kukaNkz Mvungande wathi amaphoyisa ayaphenya.
“Njengamanje kasikwazi ukukhuluma kakhulu ngalolu daba ngoba lubucayi kodwa amaphoyisa amatasa ngalo, ayaluphenya,” kusho yena. Kubonakala kwanda ukuthunjwa kwezingane kulezi zinsuku njengoba ezinsukwini ezimbalwa ezedlule kubikwe ngezingane ezintathu zaseNewcastle, nazo ebezithunjiwe.
Ngokusho kokhulumela amaphoyisa KwaZulu-Natal, uColonel Thembeka Mbhele, kuboshwe abasolwa abawu-5 abaneminyaka ephakathi kuka-20 no-70.
“Izingane ezintathu ebezithunjiwe zitholakale oSizweni, lapho ebezigcinwe khona ngabasolwa. Babanjwe nesibhamu esingekho emthethweni. Bebefuna umndeni ukhiphe imali ukuze uthole izingane kanti omunye wabasolwa uyilungu lomndeni,” kusho uColonel Mbhele.
Abasolwa bavele eNkantolo yeMantshi yaseNewcastle, ngoLwesithathu. Olunye udaba olushaqise abaningi kube ngolokuthunjwa komfana waseMpumalanga, oneminyaka ewu-13, uKathlego Marite, okubikwe ukuthi ulahleke ngeSonto kade edlala nezinye izingane eFrangani Street, eWitbank.
Okwethuse kakhulu wukuthi lo mndeni kuthiwa uthole incwadi ebibhalwe ngabasolwa ngokuthumba uKathlego bethi bafuna imali elinganiselwa ku-R1.5 million kodwa bayifuna ibe ngama-bitcoin. Kuze kube yimanje uKathlego ubengakatholakali.