Uhlonishwa ngokushaya ibhodwe uZanele
SIBALULEKILE isikhathi somndeni ku- chef osezakhele igama ezinkundleni zokuxhumana. UNkk Zanele Van Zyl (38), othi akanazo izinhlelo zokuvula indawo yokwenza ukudla ngoba lokho kuzomthathela isikhathi esiningi, ikakhulukazi somndeni wakhe, ungowokuzalwa eBergville, kodwa usezinze eRoodepoort, eGauteng.
Uthi kubaluleke kakhulu kuyena ukunakekela umndeni wakhe ebe enza ibhizinisi, yingakho eqinisekisa ukuthi noma yini ayenzayo kayimphazamisi ekubeni anakekele umyeni namadodakazi akhe amathathu
Ungomunye wo- chef abasafufusa kodwa abahlonishwayo eNingizimu Afrika. Okwehlukile ngaye wukuthi noma engabonakali njalo komabonakude noma azwakale njalo emisakazweni, kodwa ungusaziwayo osezingeni eliphezulu ezinkundleni zokuxhumana, unenqwaba yabalandeli ababalelwa ezinkulungwaneni.
Ube sezinkundleni zokuxhumana kusukela esafunda, wavula ikhasi elibizwa ngeCooking With Zanele, okuyilapho eqale khona ukufundisa ukupheka wanikezela ngamacebo okupheka ngendlela esheshayo neyongayo.
“Ngabe ngiqamba amanga uma ngingathi ngilapha ngikhona ngenxa yolwazi lwami noma kunendlela ethile engenze ngayo, kodwa ngixhaswe ngabalandeli bami abajika babe ngabangani bami.
“Yilapho ngiqale khona nokuba nomqondo wokuhambela izifundazwe ezahlukene ngibe namakilasi. Ngesekwe ngendlela eyisimanga kulona leli khasi (Cooking with Zanele)," kusho yena.
Njengamanje uba namakilasi eGoli, eThekwini, Richards Bay naseNewcastle, lapho efundisa khona ukupheka ukudla okusheshayo ngendlela enokonga.
“Impumelelo yala makilasi kimi ibe nkulu ngendlela eyisimanga kanti namanje ngiyaye ngingakholwa yindlela abantu abangeseka ngayo.
“Ngifundisa kusukela ezinganeni, omama nabesilisa ngokunjalo, kodwa njalo ngiba namakilasi ehlukile njengoba mhla ka-3 kuNhlangulana (June), ngizobe nginelinye eWestville, eThekwini ngifundisa ngokupheka ukudla okudliwa kakhulu ebusika,” kusho yena.
Uthi uqede isikole wenza izifundo ze-Information Technology (IT), lapho egcine esebenzela inkampani enkulu ekhiqiza utshwala kuleli. Kuthe ngo-2012 wakhulelwa, okuyilapho umyeni wakhe emcele ukuba ahlale ekhaya ukuze ezokwazi ukuzinakekela yena nengane uma isizelwe.
“Umyeni wami ubethanda ukungiphekela, obekwenza ngibe namahloni ngoba ngikwazi ukuziphekela uphuthu lwale eBergville,” kusho yena efa yinsini.
Uthi uqale lapho ukuthanda ukupheka, okuthe ngemuva kwesikhathi ngoba ubengasasebenzi, wacela kumyeni wakhe ukuyokwenza izifundo zokupheka.
“Ubengafuni nhlobo ezitshela ukuthi mhlawumbe ngizokwenza i- catering okuwumsebenzi obuzo- kwenza ngihlale ngingekho ekhaya, kodwa yena ubazi ukuthi kangifuni ukuyosebenza emahhotela. Ngifundile ngenza i-Cooking & Food Preparation, okuthe ngingakazithwali neziqu, ngaqala ngahlela amakilasi okufundisa ngoba ngivele ngaba nanothando lokufundisa abantu ngezindlela ezilula zokupheka,” kusho yena.
Okungajwayelekile ngoNkk Van Zyl - ikakhulukazi esikhathini samanje - wukuthi uthi ukunakekela umyeni wakhe yikhona okuhamba phambili kuyena. Uthi abanye babangani bakhe baze bambuze ukuthi kakukhona yini ukuhlukunyezwa okumenza enze ngendlela enza ngayo.
“Ngivele ngife yinsini uma aba- nye sebengibuza ukuthi kangihlukumezekile yini emshadweni njengoba ngithanda kangaka ukunakekela umyeni wami. Yingoba kunenjabulo eyisimanga engiyithola ekunakekeleni umyeni nezingane zethu nsuku zonke. Lokhu kangiphoqiwe ukukwenza, kepha yinto engithandayo ukuyenza,” kusho yena ehleka. Uthi okwehlukile ngaye wukuthi uyaqonda ukuthi abantu sebephila impilo esheshayo manje, isikhathi kasikho, ubafundisa ukupheka izinhlobo eziwu-5 zenyama ukuze bakwazi ukupheka isonto lonke kanti nokudla afundisa ngakho kuthatha imizuzu ewu-15 nangaphansi. Phakathi kwezinto athi uziqhenya kakhulu ngazo - wukwakhela unina isithabathaba sendlu ngemali azenzele yona ngokufundisa ukupheka. Uthi lokhu bekumgqugquzela ukuba asebenze, angalindeli ukuthi umyeni wakhe uzomenzela izinto, okuyinto ayifundisa amadodakazi akhe. Kulabo abanothando lokungena kulo mkhakha, uNkz Van Zyl, uthi kubalulekile ukuba lo msebenzi bawuthande, babenesineke, bakwazi ukuqhamuka namaqhinga amasha ukuze umuntu adle abakuphekile ngamehlo kuqala ngaphambi kokukufaka emlonyeni.