Baxosha ikati eziko ngokuzihlanganisa nezolimo
Umasipala ubaxhase ngogandaganda nangezimbewu zokutshala
UHLOSE ukufundisa intsha ngokubaluleka kokusebenzisa umhlabathi ukuziphilisa umphakathi waseNtabamhlophe nowaseBuhlebuyeza, eNquthu, onodedangendlale bamasimu.
Le miphakathi ehlangane yasungula imifelandawonye, okuyiNhlanhlayentabamhlophe Agricultural Co-operative ne-Owamijama Agricultural Co-operative, ithathwa njengesibonelo esihle kuMasipala wesiFunda, uMzinyathi, oholwa nguMnu Petros Ngubane, oyimeya.
Isukumile yayocela uxhaso eMnyangweni wezoLimo KwaZuluNatal, okuvela ukuthi yiwona ocele ukuba kungenelele uMasipala waseMzinyathi. ILANGA lihlangane namalungu awu-19 eNhlanhlayentabamhlophe atshale ummbila endaweni engama- hector awu-40, athe kuwadumazile ukuthi kawakwazanga ukuhlanganisa ama- hector awu-50 njengokuhlela kwawo, kodwa aphazanyiswa yisimo sezulu.
“Siqale le nhlangano ngo-2016 ngoba singafuni nje ukuhlala sigoqe izandla, silindele usizo kuhulumeni.
"Ngenxa yokuthi indawo yethu inamasimu amaningi futhi nommbila umila kahle kuyona - yize ibuye ihlaselwe nyisomiso - sithe uma sicabanga, sabona kungaba kuhle ukuthi ingahlali nje ingalinyiwe,” kusho uSihlalo Nhlanhlayentabamhlophe, uMnu Bernard Swelumbuzeli Khumalo.
Uthi emuva kokuxhumana nomnyango wezolimo, wona ubaxhumanise nomasipala ofezekise amaphupho abo.
“Umasipala usilethele ugandaganda ofike wayilima yonke le ndawo engama- hector awu-50, wasinika imbewu, umuthi wokubulala ukhula, amageja nokunye okuningi ebesikudinga ngesikhathi sisaqala.
Ngemuva kokutshala ngogadagada, kuthe uma sekufika isikhathi sokuhlakula kwadingeka ukuba sikwenze ngezandla zethu yonke le ndawo ngoba isimo sezulu besisibi ngendlela eyisimanga, singakwazi ukusebenzisa umuthi wokhula,” kusho uMnu Khumalo.
Okuqaphelekayo kule nhlangano wukuthi kayikho intsha yize amalungu ayo ethi kuye kuthi uma esexakekile, umsebenzi usungaphezu kwamandla, alande izingane zawo ukuba zilekelele.
UNkk Nokwazi Ntshangase (51), oyisakhamuzi saseNtabamhlophe, uthi yize bengakaqali ukwenza imali - kwazise lesi yisivuno sabo sokuqala, kodwa okumjabulisa kakhulu wukuthi bona njengabantu abadala bayisibonelo esihle entsheni.
"Intsha izobona kithina ukuthi ngempela ukusebenza kanzima kunemiphumela emihle. Namanje uma ngimile ngibuka la masimu angaka, kangikholwa wukuthi yimisebenzi yezandla zethu. Ngiyafisa-ke ukuthi intsha isijoyine, ikakhulukazi le ehleli emakhaya, engasebenzi,” kusho yena.
Induna yendawo, uMnu Mjumeni Buthelezi, ithi njengomholi womphakathi kuyayijabulisa kakhulu ukuthi kube nohlelo olunjengalolu. "Ummbila wabo kawubiyelwe, bahlushwa kakhulu yimfuyo nezigilamkhuba ezingamavila angafunanga ukusebenza ngesikhathi besasebenza, ziyaweba ummbila,”kusho uMnu Buthelezi.
Okwehlukile nge-Owamijama wukuthi yona ihlanganise imindeni ewu-40, okuyintsha nabadala - itshale ubhontshisi endaweni ewu70 hectors.
Unobhala wayo, uNkz Velile Nonhlanhla Biyela (35), uthi bahlalile bewumphakathi babona kunesidingo sokuziqalela into okuzoba ngeyabo, kwazise besekubhidlange ubugebengu nobubha endaweni yabo.
“Amathuba emisebenzi mancane kakhulu, ngakho-ke abantu abaningi kabenzi lutho, banesikhathi esiningi sokuganga. Ngonyaka odlule sihlanganile sacobelelana ngolwazi ukuthi singawasebenzisa kanjani amasimu angaka esinawo abengenzi lutho.
"Njengamanje sinomhlaba owu200 hectors okungowomphakathi, esifuna ukuthi wonke sitshale kuwona ukuze sihlomule sibe baningi,” kusho yena.
Omunye walo bhontshisi abawutshalile sebewuvunile bawudayisa. Imali abayenze lapho bayibeke ebhange. “Sikhetha isivuno sekhethelo sisidayise, kuthi esingagculisi kahle sihlukaniselane sonke njengemindeni,” kusho yena Uthi okuhle kule nhlangano yabo wukuthi kukhona nentsha ngoba bafuna ukuba iwufunde lo msebenzi.
UMnu Ngubane uthe: "Ngisho izimo zezulu zingahambisani nabo bayaqhubela bazikhandle. Siyafisa ke ukuthi nakwezinye izindawo nezigodi kube nje, kungabi ngezingaphansi kukaMasipala waseMzinyathi kuphela."
Uthi umasipala uzibophezele ukuthi lo mhlaba lezi zinhlangano ezitshala kuwona ubiyelwe.