ISIMO SIDINGA UBE NAMANDLA, USINGCWABE
EMHLABENI kunezimo ezikwehlelayo, ezinye zazo zibuhlungu. Iqiniso lempilo lithi kasikho isimo esingunaphakade, okusho ukuthi kayikho inkinga engadluli uma uzofunda ukungayifaki kwicooler box ukuze phela izodlulelwa yisikhathi.
Ngake ngakhuluma ngabantu abafaka izimo ku- cooler box - okuyinto okungafanele siyenze. Isimo sifuna ube namandla okukwazi ukusigqiba, usingcwabe. Izimo zihlukene kabili. Kunesimo esithi uma sikwehlele, ungaphinde usikhohlwe, kodwa okusuke kufanele usidlulise.
Ubona ngani uma isimo ususidlulisile noma usuxolile ezintweni ezakwehlela? Ubona ngokuthi ukwazi ukuxoxa ngaso kodwa ungasakhali. Ngamanye amazwi, ukuxolela noxolo yilapho osuke ukhumbula khona yonke into kodwa ukwazi ukuyikhuluma usuhleka.
Ngeke ukhohlwe wukuthi wadlwengulwa, ngeke ukhohlwe wukuthi kunomuntu owake wathandana naye nahlukana, kodwa uNkulunkulu angakusiza ukuba uphole ebuhlungwini obakwehlela empilweni. Kunezimo emhlabeni ezelashwa nguNkulunkulu kuphela.
Ngisho ungaya kudokotela wengqondo, uye kubantu ababonayo uzame konke, kukhona izimo nje abangeke bazelaphe eziyolapheka mhla wena waxhumana noMdali. Okwesibili, uma uMdali usuhlanganile naye, uyokunika iphupho, into ozoba phezu kwayo eyodala ukuba ukhohlwe yizimo ezake zakwehlela.
Iphupho lakho yinto engaphezu kwento eyakuphoxa, iphupho lakho ngumngani wakho ongasoze akuphoxe okuyothi mhla liphumelela nezimo ezakwehlela ziyonyamalala. Kuyingozi ukwehlelwa yizimo kanti kawunalo iphupho. Kuyingozi ukugilwa ngabantu kanti kawunayo into ohleli phezu kwayo.
Kuyazwela uma kuba neziwombe ezizokushaya kanti kayikho into oyenzayo empilweni, uhleli nje. Kubuhlungu ukulala embhedeni, uhlale esihlalweni ucabangana nobuhlungu obakwehlela. Masithandaze simcele uNkulunkulu ukuba asisize sibe nezinto esizenzayo, eziyodala ukuba sixolele zonke izimo ezingezinhle ezasehlela empilweni.
Bheka abantu ozwana nabo empilweni ukuthi bayasifaka yini isandla ephusheni lakho ukuze liphumelele ngoba iphupho lakho ngeke liphunyeleliswe nguwena wedwa, liyabadinga abantu abazokusiza. Bonke abantu mabake babheke emafonini abo ukuthi isikhathi basichitha nobani.
Umuntu aphelelwe wusuku engazi ukuthi ubenzani, aphelelwe wusuku evakashela abantu axoxa nabo ngezinto ezingeke zimsize. Masikhule empilweni, bonke abantu babheke kubantu abazwana nabo.
Bheka ukuthi uma ungumfana bangakwenza yini indoda kusasa, uma uyintombazane bangakwenza yini umuntu wesifazane oqotho onamandla kusasa. Sonke emhlabeni sinento eyodwa nje okuwukukhula. Sifuna amabhizinisi ethu akhule, izingane zethu zikhule, sifuna impumelelo yethu ikhule. Kumele uke uzibuze ukuthi lo muntu othandana naye uyakukhulisa yini.
Uma ubudlelwano benu bungakukhulisi, yingoba bufile. Yonke into engakhuli emhlabeni, yingenxa yokuthi ifile. Umngani onaye uyakhula yini ngaye, bonke abantu ochitha nabo isikhathi uyakhula yini ngabo? Ngiyaphinda ngithi, iyingozi into engakhuli ngoba lokho kuyizimpawu zokuthi ifile.
Ngicela ukuvala ngokukukhumbuza ukuthi siyafisa empilweni ukuba zonke izimo ezisehlele sikwazi ukuzidlulisa, kodwa ezinye ziyodlula mhla usukuma uzithuthukisa kube khona into ophezu kwayo. Masingalokhu sikhala sidabukisa. Kalikho ivesi elithi “ubusise abadabukisayo ngoba bayodatshukelwa”.
Bonke abantu mabasukume bazithintithe, izinyembezi ozikhalile zincane kunokuhleka osazokuhleka. Izinto ezilahlekile zincane kunezinto osazozithola, abahlekile basheshe bahleka uNkulunkulu akahlekwa futhi uNkulunkulu akakhohlwa.
* Uma ufuna ukuthola uMfu Zondo bukhoma, vakashela ibandla lakhe njalo ngeSonto ngehora le-10 eJewish Hall, eNorth Beach maqondana nePavillion Hotel ngo11h00. Ungaxhumana naye kwethi: 078 419 1024; Ungamshiyela nomy- alezo kuFacebook: Sthembiso Zondo Fan Page noma kuWhatsApp: 082 070 8034
* Kubo bonke abafundi bephephandaba lethu ILANGA, siyafisa ukuthi sisizane futhi ngiyafisa ukuniphendula nonke, ngebhadi ucingo noma inombolo iyodwa ngakho kakulula ukunisiza nonke. Uma ufona uyizwa ikhala, ngesinye isikhathi ngisuke ngisakhuluma nomunye. Nixole kuleyo ndawo kodwa ngokushiya nje umqhafazo, siyakubeka nasemkhulekweni.
*UPastor Sthembiso Zondo ngumeluleki nomethuli wezinkulumo ezakhayo. Uzobe ephendula imibuzo yabafundi ngezinkinga zempilo nezothando kwiLANGA LangeSonto.