Ziyashaqisa izenzo zokuhlukunyezwa
Abesifazane bagqugquzelwa ukusheshe babone izimpawu
ISIHLAVA sokuhlukunyezwa kwabesifazane silokhu sikhule njalo kodwa okuphawulekayo wukuthi lokhu esikubonayo kufana nento engekho ngoba kuningi okwenzeka esithe, okungaphumeli obala.
Lapha sikhuluma ngezigameko namacala okuhlukunyezwa kwabesifazane angabikwa. Kwazona izisulu isikhathi esiningi kazibiki ngokuhlukunyezwa kwazo ngenxa yokwesaba. Baningi abantu abaziyo ngabantu abathile abahlukunyezwayo kodwa abangasukumi babike.
Kwezinye izikhathi umphakathi uma ubona ohlukunyezwayo, kawusukumeli phezulu ulekelele, kodwa uba nemibuzo ecindezela ohlukunyezwayo, njengokuthi “uze ashaywe nje, ubenzeni”.
IZIGAMEKO EZIGQAMILE
Isigameko sakamuva esishiye abantu bebambe ongezansi ngesithinta umculi, ongumdansi, uBongekile "Babes Wodumo" Simelane ( osesithombeni), okuvele ukuthi ubehlukunyezwa ngobeyisoka lakhe, uMandla “Mampintsha” Maphumulo.
Lezi zindaba zivele ngoLwesihlanu olwedlule ngesikhathi uBabes exoxa nabasakazi beMetro FM.
Ithumba libhotshozwe ngumsakazi uMasechaba Ndlovu ogxekwe ngokuthi akalusingathanga ngendlela efanele lolu daba, kwazise uBabes ubengazi ukuthi kuyokhulunywa ngalo emoyeni futhi uzwakale emanqika ukukhuluma ngokukhululeka ngalo.
Okuqaphelekayo wukuthi belingakabikhona icala abelivulile ngokuhlukunyezwa kwakhe.
Kumanje owesilisa osemncane, uMnu Thabani Mzolo wase-Ntaba-mhlophe, eMtshezi, ubhekene necala lokudubula abulale obe-yintombi yakhe, uNkz Zolile Khumalo obeyisitshudeni eMa-ngosuthu University of Technology (MUT), eThekwini.
Ukubulawa kwalona wesifazane kuthukuthelise abaningi, ikakhulukazi njengoba umsolwa engatshengisi ukuzisola. Emasontweni amathathu edlule, iNkantolo eNkulu yaseGoli igwebe uSandile Mantsoe iminyaka ewu-32 ebhadla ejele, ngokubulala aphinde ashise uNkz Karabo Mokoena.
Isenzo sikaSandile sishaqise izwe lonke njengoba ekhombise ubulwane obesabekayo. Ukubulawa kukaKarabo kunyakazise abaningi, kwaze kwaqalwa neminye imikhankaso elwa nokuhlukunyezwa kwabesifazane.
Kuze kwasabalala ezinkundleni zokuxhumana nesiqubulo esithi #MenAreTrash.
Ngeke salibaleka futhi isigameko sokubulawa kukaReeva Steenkamp yisoka lakhe, u-Oscar Pistorius omdubule ngisho esecashe endlini yangasese.
UBusisiwe Thwala owaziwa ngelikaCici emculweni, naye usahamba icala lapho esola khona u-Arthur Mafokate, ongumculi, ngokumshaya aze amlimaze.
YINKINGA EBHEKENE NOMHLABA JIKELELE
Ngokocwaningo lwango-2013 olwenziwe yiWorld Health Organization (WHO), yiSouth Africa Medical Research Council, yiTropical Medicine neLondon School of Hygiene, oyedwa kwabathathu besifazane emhlabeni jikelele, useke wahlukumezeka ngokomzimba noma ngokocansi. Lolu cwaningo lwenziwe ngokusebe-nzisa ulwazi noma imini-ni-ngwane ( data) eqoqwe emazweni awu-80. I-WHO ithi u-38% waba-ntu besifazane ababulawayo, ba-bulawa yizithandwa zabo zesilisa.
Udlame kwabesifazane kubikwa ukuthi lungaba nomthethela ongemuhle ngokomzimba, ngokwengqondo, nasempilweni yocansi nokuzala, futhi lungandisa ingozi yokuthola isandulelangculaza.
IZINTO EZIHOLELA ODLAMENI
Imbangela enkulu yokuhlukunyezwa kwabesifazane kubikwa ukuthi wukungalingani ngokobulili nomkhuba wokwamukeleka kobudlova obubhekiswe kubona.
Embikweni weWHO, oshicilelwe ngoweLwezi (November) nyakenye, kuvela ukuthi yinkulu ingcuphe yokuba umuntu wesilisa abe nodlame uma enemfundo ephansi, enomlando wokuhlukunyezwa ngesikhathi eseyingane noma ekhule ebona unina ehlukunyezwa.
Ukusebenzisa ngokweqile uphuzo oludakayo nokuzizwa bengaphezu kwabesifazane, nakho kungaba nomthelela. Abesifazane kubikwa ukuthi bangabhekana nezimo zokuhlukunyezwa uma nabo benemfundo ephansi futhi benomqondo wokwamukela ukuhlukunyezwa.
Kungenzeka futhi ukuba babhekane nale nkinga uma bekhule behlukunyezwa noma bekhulele endaweni abebebuka kuyona izenzo zokuhlukumeza. Umuntu wesilisa futhi onophathini abaningi noma osolwa ngokungethembeki noma ngokuphinga, angaba nodlame.
BANGASIZWA KANJANI ABESIFAZANE
Kunobufakazi bokuthi ukungenelela ngokuba kugqugquzelwe abesifazane, banikwe amandla kungalekelela ekunqandeni nasekunciphiseni ukuhlukunyezwa kwabo yizithandwa zabo. Eminye imizamo okubikwa ukuthi ingaba nomthelela ekunqandeni lesi sihlava, wukuthuthukiswa kwabesifazane kwezomnotho nokubaqeqesha ngokwamakhono. NgokweWHO, okubaluleke kakhulu futhi wuku-shaya nokuthuthukisa imithetho ekhuthaza futhi egqugquzela ukulingana ngokobulili. Izinhlaka zezempilo zingaba neqhaza ekulweni nalesi sihlava ngokuba kuqeqeshwe izisebenzi zezempilo zikwazi ukubhekana nezidingo zezisulu futhi zikwazi ukusheshe ziqaphele uma owesifazane noma umntwana ebhekene nenkinga yokuhlukunyezwa.