Bazohlinzekwa ngogesi wamahhala eNkandla
Babuye baxwayiswa ngezangoma mbumbulu
KUXWAYISWE abantu baseNkandla, ngemiphuphe yezangoma ezidla imbumba esezibulalise inqwaba yabantu kule ndawo zibanuka ngokuthakatha.
IMeya yaseNkandla, uMnu Thamsanqa Ntuli, ixwayise umphakathi ngale nkinga ivakashele eMangidini, eWungu, eNkandla, ngesikhathi yethula isabelomali esiwuR150 million, sonyaka ka-2018/2019 ngempelasonto.
Itshele umphakathi ukuthi mawuqaphele izangoma obhula kuzona ngoba seziningi izigameko zokushona kwabantu ngenxa yalezi ezidla imbumba.
Kwesinye sezigameko imeya ebisusela kuzona, ngesokuhlaselwa komndeni wakwaVilakazi, eKhombe, eNkandla, okucishe kwavalwa ngehlahla kuwona ngenxa yokuthi bekunesangoma - kukhona abasola ukuthi siyabaloya.
Kulesi sigameko kubulawe uNkk Khulumile Vilakazi (76) (isangoma), uNkz Ntombiyenkosi Vilakazi (45) nendodakazi yakhe uSnenhlanhla (18) nomculi kamaskandi obeyothwasa, uBongi “Skokela” Goqo.
“Sisenkingeni ngezangoma ezidla imbumba, imiphuphe uqobo lwayo. Kuzogcina kusuka impi yezigodi ngenxa yale nto. Sengingcwabe kakhulu eNkandla, ngenxa yalesi simo.
“Umasipala uthenga amabhokisi ungcwabise imindeni izihlobo zayo, okugcina kuvela ukuthi imbangela bekade kuhanjiwe kwayiwa kumuntu onuke abanye ngo- kuthakatha.
“Kungaba kuhle umuntu aqale afihle noma imali athi isangoma masiyikhiphe ngaphambi kokuba ayobhulela izinto ezibucayi ezibulalisa abantu,” kusho uMnu Ntuli.
Lesi sabelomali abesethula uMnu Ntuli, uthi sincane kakhulu ngenxa yokuthi inkulu indawo ya- seNkandla futhi kuningi okusamele kwenziwe.
Ekhuluma ngokugigiyela okubonakala kuqondiswe kulowo owabe engumengameli uMnu Jacob Zuma, uthe; “Kunendoda yaseNkandla enomuzi wemali eshisiwe iyodwa vo, owakhiwe ngemali engaphezulu kuka-R240 million yabakhokhi bentela, kodwa kule nkeshezana yesabelomali kumele kubhekelelwe umphakathi wonke osemawadi angaphezulu kwawu-10.
“Yingakho le mali siyigade kakhulu ngoba kayinelisi neze, incane, kumele abantu basizakale. Kuyiqiniso ukuthi sesiwenzile umehluko, sekuvulwe inqwaba yezitolo ezinkulu eNkandla kwaqashwa abantu bendawo, kwakhiwa ikolishi.
“Ekupheleni kwenyanga kuzovulwa isitolo esikhulu sakwaShoprite nakhona sifuna kusebenze abantu bendawo njengoba esezoqala amakhansela aqoqe amaCV emphakathini, awanike abanikazi besitolo," “kusho uMnu Ntuli.
Kulesi sabelomali uveze ukuthi kunemali ebekelwe ukuba intsha ifundele ukuba ngonogada, abafuna izincwadi zokushayela, neyezi- ngane ezizoxhaswa ukubhalisa emanyuvesi.
U-R3 million ngowokukhulisa umnotho, uzobhekelela imifelandawonye, u-R5 million ngowokwakhiwa kwezinkulisa, u-R3 million ngowokwakha umgwaqo waseMandathane, u-R3 million ngowokwakha ihholo lomphakathi eNhloshane, u-R 3 million ngowehholo eMabhuqwini, eMazondi, eMathaniya nakwezinye izindawo.
UMnu Ntuli ubuye waveza nokuthi izakhamizi zizohlinzekwa ngogesi wamahhala ka-R50 njalo ngenyanga. Kubekwe nesamba sokuthuthukisa ezemidlalo, okubalwa iNkandla May okungumjaho wamahhashi ozokuba ngoMgqibelo khona eNkandla, okuhloswe ngawo ukuvula amathuba emisebenzi nokuthuthukisa osomabhizinisi.
Emcimbini wesabelomali kuxhashwe omama abalimayo ngezincingo zokubiya, izigxobo, amathangi okufaka amanzi nokunye.
Sisenkingeni ngezangoma ezidla imbumba, imiphuphe uqobo lwayo...