UYAZETHEMBA OZOGIJIMA I-COMRADES YOKUQALA
KABUMETHUSI ubunzima beComrades Marathon uBusisiwe Xulu waKwaMachibisa, eMgungundlovu, ozokube egijima lo mjaho okokuqala ngqa empilweni yakhe.
Umjaho wanonyaka uzokuba ngomhla ka-10 kuNhlangulana (June) usukela eMgungundlovu usongwe eMoses Mabhida Stadium, eThekwini.
UBusisiwe utshele ILANGA ukuthi usekwenze konke ukulungiselela lo mjaho webanga lika-90km. Uthi ubengazimisele ngokubamba iqhaza kuwona. Uthi kukhona omunye wabangani bakhe ovele wambhalisela ukubamba iqhaza kulo mjaho okuphoqe ukuba aqale aziqeqeshele wona kanzima ukuze angaphoxi.
“Bengivele ngigijima kodwa bengizimisele ngokubamba iqhaza kwiComrades yangonyaka ozayo sengineminyaka engama-36 ubudala. Nokho omunye wabangani bami uvele wangibhalisela. Ngibone kufanele ngingaliyeki leli thuba. Isikhathi sokubamba iqhaza kwiComrades ngisenze nyakenye kwi-Aspen PE City Marathon.
“Okunginika ithemba lokuthi ngizokwazi ukuwuqeda lo mjaho wukuthi ngenze kahle kwiTwo Oceans Marathon. Ngiwufunde kahle umzila walo mjaho kanti nama-cut-off ngiwazi njengoba ngizazi. Ngizoqinisekisa ukuthi akukho ngisho eyodwa ezongivalela ngaphandle,” kusho uBusisiwe oyiReceptionist e-US Consulate eThekwini.
Lo msubathi ubuye waveza izingqinamba eziningi adlule kuzona elungiselela lo mjaho.
“Ezokugijima ziyabiza futhi kunemijaho eminingi engigcine ngingakwazanga ukuya kuyona ngenxa yokuthi iqala ekuseni kakhulu kanti izinto zokuhamba ziyagqoza ngeSonto. Enye inkinga wukuthi ezokugijima zimba eqola.
Amateki abiza ngaphezulu kukaR1 500 lilinye kubuye kube yimali yokubhalisela imijaho. Ukuze ugijime kahle kubalulekile ukuba udle ukudla okunempilo kanti nakho akucoshwa phansi.
“Singabantu besifazane sinenselelo enkulu yokuqeda ukucanasa kwabebala kwiComrades. Uma singabambisana singabantu besifazane abampisholo singenza kangcono.
"Ngizozama ukuthola umqeqeshi ngemuva kweComrades ukuze ngenyuse izinga lami, kwazi bani mhlawumbe kungaba yimina owokuqala ompisholo ukuqopha umlando,” kusho uBusisiwe.
UBusisiwe ugijimela iTeam Vitality kanti uphethe ngokuthi uma sekusele amasonto amabili uzokuya kudokotela ukuze amxilonge ukuthi uphile kahle. Uthi waphatheka kabi ebona kushona umgijimi kwiTwo Oceans Marathon nonyaka.
Unxenxa bonke abagijimi ikakhulukazi labo abazokube beqala ukubamba iqhaza kulo mjaho ukuba baqinisekise ukuthi babona odokotela ngaphambi kwawo.
Abasubathi baKwaZulu-Natal bazogadulisana kwiKing Msinga Memorial 10km ezokuba ngeSonto kusuka ngo-06h30 ezinkundleni zemidlalo eManzolwandle, KwaXimba. Abafuna ukuba yingxenye yalo mjaho bangaxhumana noMhlengi Maxase kwethi: 079 033 7251.