UYAZETHEMBA EZAKHE KWI-SUPER RUGBY UMQEQESHI WE-SHARKS
UMQEQESHI weCell C Sharks uRobert Du Preez Snr ( osesithombeni) ukholwa wukuthi iqembu lakhe lizokwazi ukumelana nobunzima bokubhekana neJaguares yase-Argentina engagayelwa mphako kulezi zinsuku njengoba iqhelisa kwasani oluphambi kwayo.
ISharks izogadulisana neJaguares koweVodacom Super Rugby kusasa ngoLwesihlanu ngo-21h40 ekuhambeni, e-Argentina. EzikaDu Preez zizokuya kulo mdlalo zihambela phezulu emuva kokuguqisa iChiefs ngeledlule eThekwini. IJaguares yona iqeda ukubukisa ngeBulls e-Argentina.
UDu Preez ukholwa wukuthi bazokwazi ukubhekana nobunzima beJaguares azwakalise ukuthi isisezingeni lomhlaba njengoba ishaya ngabadlali iningi labo eligijima eqenjini lesizwe lase-Argentina.
“Sizobhekana neqembu eliqinile futhi elihlangene, eselikhule kakhulu kulo mdlalo njengoba bengasawenzi amaphutha awubungane abebalimaza kakhulu. Sizobahlelela kahle, ngiyabethemba abafana bami,” kusho uDu Preez.
ISharks sekusezandleni zayo ukuzibekisela indawo kowohlunga njengoba izimbangi zayo zilahle amaphuzu ngeledlule. Umdlalo olandelayo weSharks uzoze ube mhla ka-30 kuNhlangulana (June) lapho izodudulana khona neLions eThekwini.
Imidlalo yeSuper Rugby izoke ihlabe ikhefu elincane ngenxa yeyamaqembu esizwe.
Isiyonke imidlalo yeSuper Rugby engempelasonto ihlelwe kanje: KUSASA NGOLWESIHLANU Crusaders vs Hurricanes 09h35. Rebels vs Sunwolves 11h45. Jaguares vs Sharks 21h40. NGOMGQIBELO Waikato Chiefs vs Waratahs 9h35. Reds vs Highlanders 11h45. Vodacom Bulls vs Brumbies 15h05.
DHL Stormers vs Emirates Lions 17h15.