OWASE-KZN UBHEKE NGABOMVU ISINQUMO SIKA-BENNI
UMDLALI waKwaZulu-Natal usibheke ngabomvu isinqumo sikaBenni McCarthy njengoba kulindeleke ukuba amemezele ukaputeni omusha wezakhe, iCape Town City.
ICity kulindeleke ukuba iqale isizini entsha isinokaputeni omusha emuva kokuba uRobyn Johannes obeyihola ensimini ngesizini edlule, esejoyine iBidvest Wits.
UThamsanqa Mkhize odlala emuva kwiCity, kubikwa ukuthi nguyena ongase ahole le kilabhu yaseCape Town.
UMkhize ubevele abuye alibambe ibhande lobukaputeni uma uJohannes engekho.
Leli phephandaba lizithele kuMkhize ngoLwesibili ekuseni eVirgin Active, ePinetown, eqeda ukuzivocavoca labe selisebenzisa leli thuba ukuxoxa naye.
“Okwamanje asikazi ukuthi ngubani ozohola ikilabhu. Sizozwa kahle uma sesibuyela ngoba yilapho kuzokwenziwa khona isimemezelo.
"Ngiyazi ukuthi amathuba ami makhulu kodwa bakhona abanye ozakwethu abangaliphatha ibha- nde njengoMpho Matsie noThabo Nodada oqokwe njengomdlali ovelele ekilabhini. Nokho ngokwami ngikulungele ukuthatha lesi sikhundla ngoba kuyivela kancane ukuthi umfana ozikhulele emakhaya athole ithuba elinjena,” kusho uMkhize odabuka KwaXimba ngaseCato Ridge.
Uthi ayikho into emjabulise empilweni yakhe njengokusebenza noMcCarthy ozakhele udumo esengumgadli kwazise ubengalibheki ipali.
“Efika okokuqala kangikholwanga ngoba ngumuntu othathwa njengeqhawe ebholeni lakuleli, uzuze izinto ezinkulu e-Europe.
Kumnandi ukusebenza naye ngoba akukho angakwenzanga ebholeni noma ekuchazela into uyibeka ngendlela ezokwenza uyibone ngoba udlule kokuningi.
“Nokuqeqesha uyakwazi futhi unamancoko kodwa uma esefuna umsebenzi wakhe alufakwa.
"Nokho sijabule ngesikwenze kwiCity ngesizini edlule futhi nokufika kukaTeko Modise kwenze omkhulu umehluko ngoba naye uthathwa njengomdlali omkhulu ebholeni lakuleli,” kusho uMkhize.