Usekhathele wukuntunta umdlali weBucs
Kuphele unyaka egqigqa odokotela ebolekiswe kwiChippa
USEKHATHELE ukuba ngumantunta nendishi umdlali we-Orlando Pirates ongakaze azinze kuyona njengoba ephila ngokuba ngubhande mtshelekwane.
UNkosinathi “Mini Cooper” Mthiyane uveze ukuthi uthandazela ukuba iPirates imkhulule unomphelo ngoba usefuna ukuthola ikilabhu azofika alwele ukudlala kuyona. Selokhu esayiniswe yiPirates kumasizini amathathu adlule esuka kwiChippa United, uqale wabolekiswa kwiLamontville Golden Arrows.
Uthe esebuyela eMayfair, ekhaya lePirates, waphinda wabolekiswa kwiChippa sekusele izinyanga eziyisithupha kusongwe le sizini esanda kuphela.
“Inkontileka yami izophela ngonyaka ozayo. Nokho ngokukhulu ukuhlonipha iPirates, ngithandazela ukuba ingikhulule ukuze ngiye ekilabhini lapho ngizofika ngizinze khona.
"Kangazi ngempela ukuthi kungani kungahlaleki kwiPirates. Ngesikhathi sengiqala ukuthola ithuba lokuyidlalela sibhekene namaZulu FC, ngavele ngalimala amamasela sesiyodlala neChippa.
“Bekungelula ukuthi ngidlale kwiChippa ngoba ngifike ngilime- le. Ngeke ukholwe ukuthi ngichithe isikhathi esiningi ngigqigqa eGoli ngiyobona i- physio ngoba ibingekho kwiChippa,” kusho leli nxele elidabuka eNgwelezane, eMpangeni.
Uthe akhona amakilabhu amfunayo, wathi kodwa konke kulele ezandleni zePirates ukuthi inqumani ngekusasa lakhe. Ukuthole kunzima ukudlala endaweni yesinxele njengoba ubebanga ijezi noThabo Matlaba, uMarc van Heerden no-Innocent Maela.
Khonamanjalo, uMthiyane uveze ukuthi konke sekumi ngomumo ngemidlalo yezikole aseyihlela unyaka wesine.
Kulo nyaka kuzodlalwa ezinkundleni zaseMpangeni High School kanti umqhudelwano ubekelwe umhla ka-16 kuNhlangulana (June).
Uthe usefake nebhola lombhoxo kanti zingu-16 izikole ezizokube zidudulana ngosuku lomqhudelwano.
UMthiyane uthi izikole ezizonqoba zizogixabezwa ngama- projector ngaphezu kwezindondo, ijezi elisha namabhola.
Umeme abaqeqeshi bezinkulisa zamakilabhu e-Arrows, AmaZulu, iMaritzburg United, iPirates neReal Kings ukuzohlwaya ithalente ezeseka ngokuthi: “Inkunzi isematholeni.”