UVALO KOWAKULELI OYOSEBENZA KWI-WORLD CUP
KUGXABHA isisu kunondweba ozomela iNingizimu Afrika emidlalweni yeNdebe yoMhlaba eqala mhla ka-14 kuNhlangulana (June) isongwe ngomhla ka-15 kuNtulikazi (July) eRussia.
ILANGA libe nengxoxo ekhethekile noZakhele Thusi Siwela ( osesithombeni) ongumsizi kanondweba onyelwe yinyoni esandleni eqokwa yiFederation of International Football Association (Fifa) ukuyomela elakuleli kule midlalo kanobhutshuzwayo ethathwa njengemikhulukazi kwikhalenda lalo mdlalo emhlabeni jikelele. Phela kule midlalo kusuke kugijima amazwe angu-32 avelele emhlabeni.
Ekhuluma neLANGA ngoLwesibili ekuseni uSiwela, uthe njengoba ezolibangisa eRussia nje, useqalile ukubandelwa ngamathumbu. Uthi bekungcono kusanda kumenyezelwa amagama abantu abazobamba iqhaza kule midlalo.
“Bekukuhle impela kusamenyezelwa kodwa manje sekuqala ukuba nzima kwazise kule midlalo kumele uthandazele ukuhlala uqatha futhi ungalimali kusuka iqala imidlalo yeNdebe yoMhlaba kuze kube iyaphela. Kuningi engikwenzile kusuka ngamenyezelwa ukubamba iqhaza kule midlalo. Ngike ngahamba ngaya eDubai siyofundiswa okuningi yiFifa okuba-lwa indlela yokuziphatha nokuphatha imidlalo yalolu hlobo. Kumele uyazi into oyiqokelwe futhi kumele umqondo wakho uhlale njalo uvulekile.
“Ngibuye ngahambela e-Italy lapho besifundiswa khona indlela abagijima ngayo abadlali ensimini. Lokhu kwenzelwa ukuba singasaleli emuva nathi singabasizi. Kumele imizimba yethu ihlale iqatha futhi siqikelele ukufaka emlonyeni ukudla okunempilo.
“Yingakho sengiqala nokwesaba ngoba imidlalo isuke ibukwa umhlaba wonke jikelele. Okunzima nakakhulu wukuthi ngilindele into engingayazi ngoba ibhola likhula ngesivinini. Uma ubheka emidlalweni yeNdebe yoMhlaba edlule kwaxoshwa unondweba obengaziphathi kahle manje kumele siqikelele kukho konke esikwenzayo.
“Ngikhumbula nokuthi uDaniel Bennet ongunondweba wakuleli ohlonishwayo waphoqeleka ukuba abuye kule midlalo emuva kokulimala imidlalo isiqalile. Nami ngithandazela ukuba ngingabi nebhadi lokulimala kuze kuphele le midlalo,” kusho uSiwela.
Uphethe ngokubonga abalandeli bebhola bakuleli ngokumeseka ngezindlela ezahlukene kubalwa nokumgqugquzela njengoba esezolifulathela elakuleli mhla ka-2 kwezokwethwasa.
* Qaphela! Funda kabanzi ngempilo yangasese kaSiwela engosini iNgaphandle kweNkundla yeLANGA