LIPHUME NOBOVU, KUSHO UBABES

KUBULAWE umfundi waseThekwini College, obeyingoduso ekhethwe ebhentshini ebandleni lamaNazaretha, okuvela ukuthi udutshulwe wabulawa ngabantu abangaziwa eSundumbili, eMandeni, ehamba nesoka lakhe alithole esefunda eThekwini.

Kushiya imibuzo eminingi engaphenduleki ukudutshulwa kubulawe ngentululwane yezinhlamvu uNkz Nhlanzeko Gazu (20) ( osesithombeni). ILANGA lithole ukuthi isidumbu sikaNkz Gazu - okuvela ukuthi ungowokudabuka KwaNongoma - sitholakale sinamanxeba okudutshulwa eSundumbili.

Imithombo yaleli phephandaba ithi uNkz Gazu ubefunda ehlala eThekwini, uphume endlini yakhe ehamba nesoka lakhe beyovakashela kubo kwalo eMandeni. Kuthiwa bahlaselwe ngabantu besendleni ebheke kubo kwesoka kwadutshulwa kwabulawa uNkz Gazu isoka latholakala lingenamyocu. Umthombo uthi uNkz Gazu wehlelwa yilokhu nje, kubo kwaziwa umyeni wakhe osemkhiphele ilobolo, owamkhetha ebhentshini.

Uveze ukuthi uNkz Gazu ubengahlangani ngokocansi nomyeni wakhe - okunguyena obemfundisa - belinde ukuthi baze bashade. ILANGA likhulume nomunye wabangani bakhe - ocele ukuba singamdaluli - okuqinisekisile ukuthi uNkz Gazu bebazi ukuthi uyingoduso yomuntu. Uthi ufike eThekwini wathola leli soka abulawe evakashele kubo.

Isoka belingazi ukuthi uyingoduso yomuntu ngokusho kwalo mngani. Okhulumela amaphoyisa KwaZulu-Natal, uCol Thembeka Mbhele, usiqinisekisile isigameko sokubulawa kukaNkz Gazu. Uthi kuvulwe icala lokubulawa komuntu, kodwa bekungakaboshwa muntu, amaphoyisa asenza uphenyo.

Izolo ngoLwesithathu bekwenziwe inkonzo yesikhumbuzo sikaNkz Gazu eThekwini lapho bekukhona abafundi, izihlobo nabanye abasondelene nabo.

UMnu Lesema Leoto, ongusihlalo esikhungweni obekufunda kusona uNkz Gazu, uthi baphatheke kabi kakhulu ngalesi sigameko sokubulawa komunye wabafundi.

ILANGA lihluleke lancama ukuthola uvo lomndeni njengoba owesifazane ochazwe njengonina kaNkz Gazu, ale waphetha ukuphawula, wacela ukunikezwa isikhathi.