UZUMA NGEKE AXOLISE KWABE-ANC
UTHI akazisoli ngakubhale ngonyaka odlule encwadini evulelekile ngoMnu Darek Hanekom noMnu Pravin Gordhan uMnu Edward Zuma, oyindodana yobengumengameli waseNingizimu Afrika, uMnu Jacob Zuma.
UMnu Zuma utholwe yiNkantolo yezokuLingana (Equality Court) enecala loku-hlambalaza amalungu aqavile e-African National Congress (ANC) - uMnu Hanekom, ongungqonqgoshe wezokuvakasha noMnu Gordhan, ongungqongqoshe wezamabhizinisi kahulumeni.
NgoLwesibili le nkantolo imhlawulise u-R60 000 okuvele ukuthi kumele awukhokhele izikole ezimbili zaKwaZulu-Natal, okuwu- Mthombo Secondary School, eHowick ne-Ohlange High School, eNanda.
Ekhuluma neLANGA uMnu Zuma, uthe uyasihlonipha isinqumo senkantolo futhi uzokwenza njengomyalelo wayo. Uqhube wathi nakuba ezowulandela umyalelo wenkantolo, kodwa akazisoli ngakubhale encwadini yakhe evulelekile lapho abiza khona laba baholi ngabadayisi nabeseki bosomabhizinisi abamhlophe.
UMnu Zuma utshele ILANGA ukuthi ngeke axolise kulaba baholi, kodwa uzolandela umyalelo wenkantolo athi imnxuse ukuba axolise kwiSouth African Human Rights Commission (SAHRC) nakubantu baseNingizimu Afrika.
“Akukho lapho inkantolo ingiyalele ukuba ngixolise kubantu abathile, ingiyalele ukuba ngixolise kwikhomishini nakubantu baseNingizimu Afrika kuphela, ngakho ngizokwenza njalo okunye ngeke ngizihlanganise nakho,” kusho uMnu Zuma enanela ngokuthi akazisoli ngakubhalile ngoMnu Gordhan noMnu Hanekom.
Akafunanga ukuphumela obala ngokuthi uzosikhipha nini isixoliso njengoba etshele ILANGA ukuthi abameli bakhe baphezu kwalokho. UNks Tanuja Munnoo oyi-Provincial Manager yeSAHRC KwaZulu-Natal, uthe bagculisekile ngesinqumo senkantolo futhi bazolinda uMnu Zuma alandele umyalelo wayo ngaphandle kokukhetha okuthile kuwona. Bheka ekhasini 20
Inkantolo ingiyalele ukuba mngixolise kwikhomishini, okunye angizihlanganisi...