Saze saphumula yilesi sicefe somshado wamaNgisi
ABANTU abangayidli inyama basuke beyaphi ezosweni? Phela uma kuhlatshiwe kusuke kuwiswe isilwane, hhayi obhatata namadumbe.
Ulisukela kanjani nje ithanga noma ibhece uthi uyalihlaba, bese umema abantu uthi kunezoso? Benginezoso kwami ngempelasonto ngoba ngizwe ngihalela inyama yokosa, futhi ngithe nje ake ngimeme amakloza esenza nawo umculo nemidwebo, sizijabulise.
Phela uma ungumnuzane kumele wose nje kungenzekanga lutho, kunuke inyama ukuze namadlozi athakase, abone ukuthi umuzi ufudumele.
Sithe masihlangane nje nezinsizwa sikhiphe isithukuthezi, kwazise zonke iziteshi zikamabonakude bezidlala lesi sicefe somshado wamaNgisi sengathi ubaluleke umhlaba wonke. Nathi sinabo ubukhosi e-Afrika, futhi kasiphetwe ngamaNgisi.
Ithe isasha inyama, sisazitika ngezinkamba zikaFaro, kwatheleka ezinye izinsizwa ebengingazimemile, zihamba nezintokazi zabelungu, kukhulunywa isiNgisi lesi esimpintshwa ngamakhala. Thina-ke esakhulela emakhaya safundiswa ukuthi abantu kabaxoshwa uma kuhlatshiwe, sibemukele ngomoya kaJesu sabapha nenyama.
Nakuya-ke sebeyinqaba bethi bona kabayidli inyama, badla izaqathe kuphela. Amasoka wona ngiwabone emehlweni ukuthi ayayihalela kodwa esaba izintombi lezi zawo.
Bathe sebengazidlela amasaladi nje uma ekhona, sabhekana emehlweni nezinsizwa sahleka sodwa ngoba phela uma kuhlangene izinsizwa akekho umuntu ozihlupha ngamasaladi, kudliwa inyama yehliswe ngotshwala kuphela.
Ngitshele lezi zinsizwa ukuthi mazithume izintokazi lezi ziye ekhishini ukuze zizobona ukuthi zingahlanganisani kulezi zaqathe ezikhona, kodwa zangibuka sengathi ngizichaphe ngenkulu inhlamba lena.
Lezi zintokazi ebezihamba nazo, bezigqoke ziconsa, ziziphaqule ngobhekeniphawoda, zisho nangezinzipho zokufakelwa ezinde ezingaklwebha umuntu eme esangweni. Ngimane ngabona nje ukuthi ibhodwe kalaziwa lapha, kudliwa ezitolo.
Phela umama wekhaya, okunguye ozihlupha ngamasaladi uma sosile, ubesavakashele kubo eyoncela kunina. Mina kangisaso isikhathi sokosa izaqhathe inyama ikhona. Ngibe sengibabuza kahle nje ngomoya kaJehova ukuthi kanti bona bebethi bayaphi, base- bethi bezwe ngenzwabethi njengoba bazana nezinye zalezi zinsizwa ebengizimemile. Ngibatshele ukuthi-ke cha bahambe kabi, sebeyoncenga ephalishini ne- chakalaka lena yasethinini ebengiyithengile.
Bathe bayavungama, ngabatshela ukuthi akekho umuntu ohluzekile ekhanda oya ezosweni engayidli inyama ngakho-ke, mabayeke ukuba yisicefe ngoba phela hleze bahlangane nesibhaxu bengalindele.
Besizibukela imidlalo yebhola kwi- catch-up lena yeMultichoice, siwukhiphele ngaphandle umabonakude. Gwiqiqi abantu abangamenyiwe sebefuna ukubukela umshado wasebukhosini bamaNgisi.
Ngivele ngabona nje ukuthi habe, nansi ingulube inginonela. Phela thina, inkosi yethu yiSilo samaBandla, uZwelithini, ngakho kasinendaba nemigcagco yobukhosi bezizwana. Uma eyethu inkosi igcagcelwa, kawukaze ubabone ondlebezikhanyilanga bejabule futhi bewuthakasela umcimbi njengoba benza uma kushada abelungu bakubo eNgilande.
Kungani-ke thina njengedlu emnyama sizimbandakanya nabo sengathi lobu bukhosi ngobethu nathi? Ake sijabulele ezethu izinto nathi, singabi ngothathekile ngoba sifuna ukujabulisa noma ukwamukelwa ngabamhlophe.
Masibayeke bajabulele ezabo nabo izinto, thina sibhekane nezethu. Phela angithi sithi sikhululekile, kodwa sisenza sengathi sisabuswa yibona ondlebe. Isho ukuthini inkululeko?
Thina sikhethe ukubukela ibhola ngoba zonke iziteshi zikamabonakude bezikhombisa lo mshado kaPrince Harry nalo mkakhe waseMelika. Obethu ubukhosi bubalulekile kithina njengoba lobu bamaNgisi bubalulekile kondlebezikhanyilanga.
Ngizitshelile lezi zinsizwa ukuthi thina kasinendaba nalo mgcagco futhi ngeke sibukele le nyunsense ezifuna ukuyibukela ngoba nje sithi sifuna ukujabulisa izintombi zazo. Kazibalulekile ukudlula thina ngoba nje zingabelungu futhi azimenyiwe.
Kube wukubona indlela-ke kwalezi zinsizwa zamavejithwabuli, zalandela nezintombi. Sisalile sizitika ngenyama thina, sibukela ibhola lethu ngokuthula noxolo.
Phela ukuya ezosweni ungayidli inyama kufana nokuya ebhusha uthi uyothela unemenayithi, noma uye elenki yamatekisi kodwa ube uthi ufuna ukugibela ibhanoyi. Washo noMzwakhe Mbuli kwenye yezinkodlo zakhe wathi: “Ukukhubazeka kwengqondo, wukukhubazeka komuntu…”
THINA KASINANDABA NJE NALO MGCAGCO WABO.