Ingebhe kuRonaldo ngowamanqamu we-Uefa
USalah ujabulela ukuvuza kodonga lweMadrid
INGEBHE kuCristiano “CR7” Ronaldo ongumdlali weReal Madrid yaseSpain ongaconsi phansi kubalandeli bale kilabhu ngeLiverpool yase-England.
La makilabhu azobhekana kowamanqamu we-Uefa Champions League ngoMgqibelo ngo20h45 e-Ukraine.
Lo mdlalo kulindeleke ukuba ubukwe wumhlaba wonke njengoba la makilabhu ehlonishwa futhi elandelwa ngisho nangaphandle kwase-Europe.
IMadrid yiyona ethishwa ukudla umhlanganiso kulo mqhudelwano njengoba iyizingqwele zawo.
Kulindeleke ukuba iwunqobe kalula lo mdlalo njengoba inabadlali abaseqophelweni eliphezulu uma beqhathaniswa nabeLiverpool.
URonaldo uthi nakuba beyizi-
mfivilithi ukunqoba lo mdlalo kodwa unovalo ngeLiverpool.
“Indlela iLiverpool edlala ngayo ingikhumbuza ngezikhathi zeMadrid zaseminyakeni embalwa edlule lapho ibinabadlali khona abasheshayo.
Lo mdlalo uzokuba nzima futhi ngishaywa wuvalo olubi ngawo. Njengoba bekowamanqamu nje, yingoba kubafanele, badlale kahle.
“Okungisabisayo nje ngabo yindlela abashesha ngayo nangendlela abawahlohla ngayo amagoli. Kodwa-ke sinesipiliyoni uma usiqhathanisa nabo futhi kunomlando osihlalele okufanele siwuqophe.
"Sifuna ukuyoqopha umlando ngale nkomishi, sizimisele ngokusivikela isicoco sethu,” kusho uRonaldo.
UMohamed “Moh” Salah ongalibheki ipali kwiLiverpool futhi oqokwe njengomdlali ovelele e-England, uthi abanalo ngisho oluncane uvalo ngeMadrid.
“IMadrid inomqeqeshi oseqophelweni eliphezulu futhi nabadlali bayo ngokunjalo kodwa siyakwazi okufanele sikwenze. Ukuze sibehlule kulo mdlalo kufanele sibeke uvalo eceleni sidlale ibhola ngendlela esilazi ngayo. Khona ngeke kube wumdlalo olula kodwa nathi kufanele singene kuwona sizitshela ukuthi singabadlali abaseqophelweni eliphezulu.
“Engingakungabazi nje wukuthi lo mdlalo uzokuba namagoli. Okuhle ngabo futhi okungase kusisebenzele wukuthi bayavuza emuva, kuzofanele sikusebenzise lokho,” kusho uSalah.
IMadrid ifuna ukuqopha umlando nje, yingoba ifuna ukunqoba le nkomishi amahlandla amathathu kulandelana ngaphansi kobuholi bukaZinedine Zidane.
IMadrid ifuna ukulandela ezinyathelweni zeBayern Munich yaseGermany njengoba yenze ngo1976 inqoba le nkomishi amahlandla amathathu elandelana.