Ubulale unina obengamazi uyise
Uye kumthandazi wamtshela esinye isibongo
ASABAMBE ongezansi amalungu omphakathi wakwa-K eMlazi ngowesilisa (28), obhokode unina amanxeba awu-7 wambulala ngoba efuna amkhombise uyise omzalayo.
Umsolwa - esingeke simdalule igama lakhe aze avele enkantolo - kuthiwa wenza lokhu nje, ubebuya kumthandazi omtshele ukuthi isibongo asisebenzisayo kakusona esakubo. Kubikwa ukuthi uNkz Nomvula Majozi (59), ubulawe yindodana yakhe - abengahlali nayo - phambi kwesoka lakhe elinguMnu Mbukiseni Khuzwayo (59) ngoLwesibili ntambama.
Ngesikhathi ILANGA livakashele lo mndeni, bekunzima ngisho ukukhuluma kuMnu Khuzwayo ngenxa yento ayibonile, isithandwa sakhe sifela ezandleni zakhe. Utshele leli phephandaba ukuthi umsolwa ugila le mihlola nje, ubesethenge imi-thombo ecele unina ukuba amgayele umqombothi obuzophuzwa ngeSonto.
“Bekungabo-6 ntambama sihleli sobabili noNomvula sibuka umabonakude ngesikhathi kufika indodana yakhe. Ibibonakala ukuthi iphuzile, ilwisa unina ithi ifuna ayikhombise uyise oyizalayo. Ingene isiphethe ummese yaqonda kunina imbiza ngesifebe, ithi isikhathele nguyena engafuni ukuyikhombisa uyise. Imbhokode ngommese, ngesikhathi yenza lokhu ibibhizi imthuka imbiza ngesifebe.
"Kuthe noma ngizama ukuyikhuza, yangitshela ukuthi izongibulala nami, mangihlukane nayo phansi. Inele yabona ukuthi unina usethule, yathatha izimpahla zayo, amakhandlela neziwasho ebuye nazo kumthandazi yaphuma ngejubane ibaleka,” kusho uMnu Khuzwayo.
Uthi bekungekhona okokuqala umsolwa enza into efana nalena ngoba efuna uyise. Uthi ekuqaleni kwalo nyaka, ufike ephethe ucelemba wagijimisa ngawo unina ethi ufuna uyise. UMnu Khuzwayo uthi sebeneminyaka engaphezu kwewu-10 behlala ndawonye nomufi.
Uveze ukuthi umsolwa ufike ngeledlule eswenkile, egqoke kahle wapha unina u-R500 wabe esemnika imali yokuba athenge imithombo nezinkukhu.
Uthi utshele unina ukuthi uthole imali etohweni lakhe, wabe esecabanga ukuthi agaye umqombothi, athenge nezinkukhu ukuze alungise izinto zakhe abekhala ngokuthi kazimhambeli kahle.
“Bekukuhle zonke lezi zinsuku, kungekho lutho olusolisayo ngaye. Uvuke ekuseni waya emtholampilo ehambisa imiphumela yesikhwehlela njengoba ebekhwehlela. Ubuye emini ngalo usuku lwesigameko eseshintshile, esenolaka, watshela unina ukuthi uzomgwaza ngoba akafuni ukumtshela uyise.
"Bengizitshela ukuthi uyadlala ngesikhathi esho njalo. Unina udonse ucingo lwakhe phambi kwakhe umsolwa wafonela indodana yakhe endala eyazisa ukuthi uma etholakala eshonile, abokwazi ukuthi ubulawe ngumsolwa ngoba umsabisa ngokuthi uzomgwaza.
"Uphume endlini wahamba wabuya ngabo-6 esezomgwaza ngempela,” kusho uMnu Khuzwayo izinyembezi zigcwala amehlo. Uthi umsolwa useke waboshelwa icala lokubulala umuntu eSiphingo kodwa wabuye wadedelwa ngenxa yokuthi ubeseyingane ngesikhathi enza lelo cala.
Ubekhuluma naleli phephanda- ba elokhu ebalise njalo ngesinqandamathe sakhe. Uthi ufe olwembiza ngokushona kwaso ngoba yisona ebesimise ikhaya. Amalungu omphakathi akhulume neLANGA, ababaze unya lukamsolwa, athi abejwayele ukumbona uma evakashele unina.
ULt Colonel Thulani Zwane okhulumela amaphoyisa KwaZuluNatal, uthi likhona icala lokubulala elivuliwe, kodwa bekungakaboshwa muntu. Amaphoyisa asaphenya. nomfundo@ilanganews.co