UKHOZA UBHOBOKA NGOKHUZWAYO
UBHOBOKA ngokushoda kwemali uDkt Irvin “Iron Duke” Khoza ( osesithombeni), onguSihlalo wePremier Soccer League (PSL), okuyisimo akholwa wukuthi singase sikhinyabeze amakilabhu.
IPSL ithathwa njengenye yamaligi amakhulu emhlabeni njengoba kuthiwa ibalwa nangu-10 enza kahle ngasohlangothini lwezomnotho. Nokho kunemibono eqhamuka kubathandi bebhola nezingqapheli, abakholwa wukuthi iligi yakuleli kufanele inyuse isibalo samakilabhu, njengoba engu-16, abe ngu18.
Engxoxweni uKhoza abe nayo neLANGA izolo ngoLwesithathu ekuseni, ulinekele konke ngesimo sePSL.
“Abantu bayakhuluma nje ngoba kabazi ukuthi isimo sinzima kwezomnotho, izinkampani zidonsa kanzima. Ukuxega kwesimo somnotho kwenza ukuba nathi siyiPSL sikhinyabezeke.
"Izinkampani ezisixhasile zifuna ukwazi ukuthi njengoba zikhipha imali yazo nje zizozuzani kwazise isimo sesibheda ngalolu hlobo.
“Isimo sinzima ngeke nje kukwazi ukuthi isibalo samakilabhu senyuke, ingaqhamukaphi leyo mali? I-PSL yenza imicimbi engu380 ngesizini, ukuhlela umdlalo kuwumcimbi odla eningi imali, ngakho-ke abantu kufanele bakuqonde lokho. Uma sandisa isibalo samakilabhu, lokhu kuzokube kusho ukuthi kufanele sinciphise imali yesibonelelo etholwa ngamakilabhu zinyanga zonke ukuze sinike nalawo azokube esengenile,” kusho uKhoza.
Limbuza leli phephandaba ukuthi njengoba kungeke kube lula ukuthi kwenyuke isibalo samakilabhu ngabe izokwenyuka-ke yini imali yesibonelelo semali etholwa ngamakilabhu ngesizini ezayo, uthe: “Akukho kumthethosisekelo wePSL ukuthi amakilabhu adlala kulesi sigaba kufanele siwanike imali. Sisuke senza umusa nje. Ngelinye ilanga uzophela, abantu kufanele bazihlinzekele ngoba isimo sinzima. “Awukwazi ukuthatha imali yakho uxhase ibhizinisi lomunye umuntu kodwa siyakwenza lokho empeleni akufanele. Ukudayiswa kweBloemfontein Celtic kuyizinkomba zokuthi isimo kasisihle, umnotho uyabheda. Nokho sizoqhubeka nokuyilwa le mpi mhlawumbe ngelinye ilanga kuzolunga,” kusho uKhoza.