I-DA isola uDube-Ncube ngenkohlakalo yamathenda
Seyibhalele nondunankulu waKwaZulu-Natal
IKHOMBA ngenjumbane uNgqongqoshe wezokuBusa ngokuBambisana nezoMdabu KwaZulu-Natal, uNkk Nomusa Dube-Ncube iDA kulesi sifundazwe, imsola ngokubandakanyeka ekunikweni komyeni wakhe, uMnu Sibusiso Ncube amathenda ezigidi komasipala ababili.
Leli qembu lithi selize labhalela ngisho uNdunankulu waKwaZulu-Natal, uMnu Willies Mchunu, lithi kumele amhlalise ekhaya uNkk Dube-Ncube ngesikhathi esaphenywa ngale nkohlakalo elithi lisola ukuthi ubenomthelela ekubeni uMnu Ncube, athole la mathenda kuMasipala waseNkandla nowaseMthonjaneni.
Esigcawini sabezindaba ebesiyizolo ngoLwesithathu emahhovisi eDA eThekwini, ubuholi baleli qembu KwaZulu-Natal buveze ukuthi eNkandla naseMthonjaneni kuhlomule iBrand Partners (Pty) kaMnu Ncube ngethenda yokubhekelela ezokuxhumana.
ENkandla ithole ithenda yeminyaka emithathu ka-R7 750 404.00 kanti eMthonjaneni ibe wu-R8.2 million. UMnu Zwakele Mncwango ohola iDA KwaZuluNatal, uthe ngokuthola kwabo, kakulandelwanga imigudu efanele kukhishwa la mathenda.
Uveze ukuthi bayakholwa wukuthi ukungabi neziqu ezifanele kwezimenenja zalabo masipala kubenomthelela omkhulu ekubeni ungqongqoshe avalwe umlomo - ngokuthi kunikwe umyeni wakhe la mathenda - ukuze ihhovisi lakhe lingalandeleli.
Ngokwemaphepha leli qembu eliwakhombise abezindaba, okuyimiqingo elithi liyithumelele ihho- visi likandunankulu - kuvela ukuthi ihhovisi likaNkk Dube-Ncube, likuchithe kwaze kwaba kabili ukuthi uMnu Langelihle Jili abambe esikhundleni sokuba yimenenja eNkandla.
“Lokhu kwenzeke ngonyaka odlule ngoNhlolanja (February) lapho ihhovisi lakhe uNkk DubeNcube lenqabile ukubeka uMnu Jili ngoba lithi akanazo izicucu zemfundo ezanele ukuthi angangena kuleli hhovisi.
“Kuyashaqisa-ke ukuthi ngawo unyaka odlule ngoZibandlela (December), uMnu Jili lona nguye futhi osayinile ukuba kunikwe inkampani kaMnu Ncube umsebenzi," kusho uMncwango.
Uthi iDA ilindele ukuthi uNkk Dube-Ncube achaze ukuthi yenzeka kanjani into enjengalena. Kuwona lo mqingo kuphinde kuvele ukuthi ngemuva kokuba ihhovisi likaNkk Dube-Ncube lenqabile ukuqasha uMnu Jili okwesibili, lo masipala (Nkandla), ubhalele uNgqongoshe wezokuBusa ngokuBambisana nezoMdabu kuzwelonke obekunguMnu Des Van Rooyen ngaleso sikhathi - ufisa ukuthi acubungule isicelo sokuqashwa kukaMnu Jili - nalapho wa- chithwa ngoba kuthiwa kunabanye abawu-8 abaneziqu ngaphezu kwakhe uMnu Jili.
“Siyakholwa wukuthi ukuphuma kwala mathenda enikezwa uMnu Ncube afana nomgwazo wokuthi ungqongqoshe angalandeleli ukuqashwa kukaMnu Jili kulesi sikhundla.
“Nakhona futhi eMthonjaneni kwenzeke into efanayo kanti siyakholwa wukuthi la mathenda anikezwe umyeni kangqongqoshe ngoba kuvalwa yena umlomo,” kusho yena.
Uqhube wathi uhulumeni wasekhaya uwumgogodla wokuhanjiswa kwentukuko nezidingo emiphakathini, okwenza isenti nesenti libaluleke.
“Kakukwazi-ke ukuthi umasipala usetshenziswe njengento okuzohlomula kuyona izikhulu nemindeni yazo,” kusho uMnu Mncwango.
Ilungu leDA esiShayamthetho saKwaZulu-Natal, uMnu Hlanganani Gumbi, lithe bazimisele ngokulandelela ukuthi ungqongqoshe aphendule ngoba kuyimanje komasipala bakulesi sifundazwe babalelwa ku-53% abangenzi kahle.
Leli qembu lifuna uNkk DubeNcube amiswe nazo zombili lezi zimenenja zomasipala ezithintekayo. Lithe linika uMnu Mchunu izinsuku eziwu-7 ukuba agudluze uNkk Dube-Ncube, kungenjalo lizomshaya ngevoti lokungamethembi yena uqobo (uMnu Mchunu).