Idedelwe ngebheyili inyanga yodumo
Lsolwa ngokudlwengula owesifazane ebimelapha
IDEDELWE ngebheyili inyanga yaseMawoti, eNanda, evulelwe icala lokudlwengula owesifazane waseMbalenhle, esifundazweni iMpumalanga. Lona wesifazane ubeseThekwini eyokwelashwa yile nyanga emzini wayo.
Le nyanga (35), esingeke silidalule igama layo ngenxa yezizathu zomthetho, iboshwe ngeSonto ebusuku.
ILANGA lithole ukuthi le nyanga iphinde ibe ngumfundisi ongcwabayo, ashadise.
Kuthiwa iboshwa nje ibiphuma komunye umngcwabo lapho kade ihola khona inkonzo.
Ingenye yezinyanga ezaziwayo eThekwini njengoba ijwayele ukuzwakala kweminye imisakazo yesiZulu ikhangisa ngamakhambi ayo.
Lo wesifazane - esingeke simdalule igama lakhe ukumvikela - uvulele le nyanga icala eyisola ngokuthi imluthe ngokuthi iyamelapha ngesikhathi imdlwengula esigodlweni sayo.
Leli phephandaba libike kabanzi ekuqaleni kwaleli sonto ngokuvulelwa kwale nyanga icala lokudlwengula lona wesifazane obeyisiguli sayo.
Isisulu siveze ukuthi sehlelwe yilo mshophi nje, besihamba noyise beyokwelashwa yile nyanga. Sithe baqale ukuzwa ngale ndoda emsakazweni.
Bathathe inombolo yayo, uyise wayifonela bahlela nayo (inyanga) ukuthi baye eThekwini.
Sithe ngesikhathi uyise efonela inyanga, ibathembise nokuthi izobazamela indawo yokulala ngenxa yokuthi basuka kude.
Sitshele ILANGA ukuthi konke kuhambe kahle ngosuku lokuqala befikile, inyanga yabahambisa empophomeni bayogezwa.
Babuye lapho yabatshela ukuthi izobelapha ngo-R6 000 bobabili, bazikhalela yagcina ibelapha ngo-R5 000, ngokusho kwesisulu.
Sithe indaba yonakale sekuyisebusuku inyanga isibabizela esigodlweni ngokwehlukana noyise.
Iqale yabiza uyise, waphuma esephethe imithi yakhe, eselungiselwe nendawo azolala kuyona. Sekungena sona esigodlweni, inyanga ithe izosigcaba esithweni sangasese ukuze sisizakale ezinkingeni zothando ebesibhekene nazo.
Sithe ngemuva kokudlwengulwa sikhulumile nenyanga siyitshela ukuthi siyazi ukuthi lokhu ebikwenza kusona bekuwukuyidlwengula. Sithi igcine iwubuyisile u-R5 000 abawukhokhile ngesikhathi ibelapha ngoba ibavala ukuthi udaba bangaluyisi emaphoyiseni.
Okhulumela amaphoyisa KwaZulu-Natal, uCapt Nqobile Gwala, ukuqinisekisile ukuboshwa kwenyanga ngeSonto ebusuku.
Uthi ivelile enkantolo ngoLwesibili icala layo lahlehlela umhla ka-7 kuNcwaba (August).