AKAFUNI KUZILWE UYISE WENGANE ELAHLEKILE
AKAYIZWA eyokuzila noma eyokuthi kuhlalwe emakhandleleni owesilisa waseNchanga, osekuphele izinyanga eziwu-5 kulahleke indodakazi yakhe isesontweni.
UMnu Mxolisi Ngwane (29) uthi ngisho kungaphela iminyaka ewu20, kodwa uma indodakazi yakhe, uSphesihle Zamangwane Dlamini (3), ingakatholakali, akazimisele ngokuyizilela noma kube khona umuntu ohlala emakhandleleni.
USphesihle ulahleke mhla ka-31 kuZibandlela (December) kade esesontweni nonina, uNkz Thabisile Dlamini (21), waseMandawe, eMzinto.
“Sinzima kakhulu isimo esibhekene naso njengoba kuze kube yimanje kasikamtholi uSiphesihle. Sesizame konke esicabanga ukuthi kufanele ngabe sikuzamile njengabazali.
“Ngisho umphenyi ozimele ( Private Investigator) esimqashile, ugcine eliyekile icala ngoba ekhala ngokuthi akatholi lutho kanti nemali yokumkhokhela ibingasekho. Ugcine ethi masingamkhokheli, uzoqhubeka nokubheka. Sibonile ukuthi wenzela ukuthi singalahli ithemba,” kusho uMnu Ngwane.
Udaba lokulahleka kukaSiphesihle lwaba sematheni kwazise ukulahleka kwakhe kwaba yindida ngisho nasemndenini wakhe uqobo. Wayehambe nonina emenywe ngomunye umakhelwane wakhe enkonzweni yebandla angakhonzi kulona.
Ekhuluma naleli phephandaba emuva kokulahleka kwengane, uNkz Dlamini wathi ngesikhathi inkonzo iphakathi, umfundisi waleli bandla abelihambele wacela izivakashi ukuba zisukume ziye phambili ziyobingelela abazalwane.
Uthi wayebeke isikhwama sakhe phezu kwengane ukuba isigone ngesikhathi esaya phambili. Lokhu uthi kakuthathanga sikhathi esingakanani, kodwa wathi esebuya phambili wafika ingane ingasekho lapho yayihleli khona.
Waphuma wayobheka ngoba kuthiwa ilandele ezinye ebeziya esitolo. Walandela umkhondo kwathiwa ibonakale iya ngasesitolo kodwa wagcina engayibonanga ukuthi iphelelephi.
Phakathi kwezinto akhale ngazo uNkz Dlamini, wukuthi ngisho eseshilo kuleli bandla ukuthi uselahlekelwe yingane, abazalwane kabazange bamlekelele ukuyibheka. Kwadingeka ukuba abuyele kubo ayobika khona, kwayima kuphuma umphakathi ibhekwa.
Ezinyangeni ezimbili ezedlule uNkz Dlamini ekhuluma naleli phephandaba, wakhala kakhulu ngokwenzelwa phansi ngabomthetho njengoba ethi amaphoyisa achitha isikhathi eside ephenya bona, okwabenza babona sengathi yibona abasolwa.
“Kwaze kwadingeka ukuba sinoyise wengane sifakwe emshinini wokubheka ukuthi kasiqambi yini amanga ( lie detector), ukuze kubonakale ukuthi kasiwazi ngempela umkhondo wengane,” kusho yena.
Kwale noma sekunezinhlangano eziqoqe umehlokaboni kaR50 000 kodwa wangavela umkhondo ngoSphesihle.
Okhulumela amaphoyisa, uCol Thulani Zwane, uthe namanje ingane beyingakatholakali, amaphoyisa asayithungatha.