LIPHEZULU IZINGA KWI-BOOTCAMP
INTSHA izogudlana amahlombe nosaziwayo mahhala kwiYouth Arts Bootcamp, eMoses Mabhida Stadium eThekwini, kusukela mhla ka-14 kuya mhla ka-16 kule nyanga, lapho izobe ihlonyiswa ngamasu okwenza ngcono endimeni yomculo, ezamabhizinisi, amafilimu nokunye.
Lezi zindaba ziqinisekiswe ngumhleli walo mcimbi, uThabo Mpakathi we-Isolokhozi Productions. UThabo uthi ngonyaka ophelile izinkampani ebezikhangisa kulo mcimbi bezibalelwa ku-10, kulo nyaka izinga linyuke kakhulu njengoba kungene izicelo ezibalelwa ku-30.
“Lokhu kukhombisa ukwenyuka kwezinga labantu abafuna ulwazi nabazimisele ngokunikezela ngolwazi abanalo emikhakheni yabo,” kuqhuba uThabo.
Lo mcimbi ubusePlayhouse nyakenye kanti ukwenyuka kwesibalo sabawuthamelayo yiso esidale ukuba uthuthelwe eMoses Mabhida.
I-Youth Arts Bootcamp izokwamukela nabafundi bezikhu- ngo zemfundo ephakeme abenza izifundo zeMusic Production neArts abazothola ithuba lokubonana nosaziwayo asebezakhele igama emikhakheni abakuyona, okubalwa kubo uDJ Happygal ongomunye wabahleli balo mcimbi.
Lo DJ uzocobelela ngolwazi kwezokuklwebha amapuleti aphinde anandise ngosuku lokugcina lwalo mcimbi.
Kuzobe kukhona uDJ Le Soul weGagasi FM noNomalanga Shozi, ongumethuli wezinhlelo zikamabonakude abuye alingise.
Le Bootcamp izophinde yenze umcimbi wokuvala lapho kuzonandisa khona osaziwayo abehlukene (mhla ka-16 okuwusuku lwentsha).
Ekuseni kuzoqalwa ngeFashion Street Show kanti wonke lo mcimbi uzokwethulwa kwiMTV Base. ILANGA liyingxenye yabaxhasi balo mcimbi.