Uyakhula emkhakheni wokubhaka
UGugu uthi ungumuntu ohlale ezifundisa into entsha
UZIMISELA ngokwaziwa ngisho phesheya kwezilwandle ngethalente lakhe umbhaki oseke wabhakela nosaziyo, okubalwa kubona nomsakazi woKhozi FM, uSthandwa Gama (uMaNzuza), ambhakele ikhekhe lomshado elisezingeni eliphezulu.
UGugu Vuyo Mazibuko (22), ungumnikazi wenkampani iGugu The Baker. Okwehlukile ngaye wukuthi ibhizinisi lakhe lisebenza kakhulu ezinkundleni zokuxhumana, ikakhulukazi i-Instagram.
Le nsizwa engeyokuzalwa oNdini, ithi ifike kanzima lapho seyikhona kwazise unina ubengayeseki ngaleli phupho layo ngoba ubefisa ukuba yenze izifundo enyuvesi.
Ukufezekisa isifiso sikanina, uGugu uthi uqede umatikuletsheni ngo-2014 waya e-University of KwaZulu-Natal (UKZN), eMgungundlovu, lapho engene khona wenza iziqu zeBsc, wafunda izinyanga ezimbili washiya phansi ngoba ebona ukuthi kakuyona into ayifunayo.
"Ngingene khona ngoba ngijabulisa umama. Ngisho nalezi ziqu ebengizenza kangizithandanga, ngicelile kumama ukuthi ngifuna ukushiya ngiyofunda enye into. Bengazi ukuthi noma ngabe kwenzekani kodwa ngifisa ukungena emkhakheni we- hospitality ngoba uthando lwami beluvele lulapho,” kusho le nsizwa eqede umatikuletsheni eMasibumbane High School, khona oNdini.
Uthi ngemuva kokuphuma e-UKZN, ubuyele kubo ngoba isikole ubengeke esakwazi ukusithola.
"Kunomzala wami owenze izifundo zokupheka obenenkinga engawutholi nhlobo umsebenzi, okuyikhona obekwenza umama angafuni ukuba ngifundele lo msebenzi,” kusho yena.
Uthi ngoNtulikazi (July) 2014, uthole isikhala eMajuba College wenza iHospitality Management and Practices. Okumangalisayo ngale nsizwa wukuthi nakhona lapha ifunde izinyanga eziwu-6 kuphela, yashiya phansi.
Ithi kuleli kolishi iphazanyiswe wukuthi okuningi bekungabhalwa phansi, bekufundwa encwadini nje kuphela, okuyinto engayisizanga. "Ngibone lapho ukuthi kangiyena umuntu wezincwadi kepha ngifuna izandla zami zisebenze okwangempela.
"Ngibatshelile ekhaya ukuthi sengifuna ukuphuma lapha, okuyinto engehlanga kahle kubona," kusho uGugu.
Uthi ngoba isikole abefuna uku- yofunda kusona siyabiza, uphoqeleke ukuhlala kubo ukuze kube kuzanywa imali yokuba ayofunda. “Bengifuna ukuyofunda e-International Hotel School, eWestville, okuyilapho ngigcine ngifunde khona ngemuva kokuba umama engibolekele imali engaphezulu kuka-R40 000 ebhange. Ngifunde izinyanga eziwu-6 ngathweswa iziqu zokuba u- chef,” kusho yena.
EWestville wenze izifundo zePatisserie - okusho ukuthi uyi- pastry chef. “Yonke into ebhakwayo ngiyayenza kodwa ukuhlobisa ngizifundise mina ngokubuka ama- video kuYoutube ngoba esikoleni kasikufundanga ngo- kwanele.
"Bengifunda lapho bese ngihamba ngiyothenga amathuluzi okwenza," kusho yena. Uthi uyakholelwa ekutheni ibhizinisi lakhe ngabe selikhule kakhulu ukuba uyakwazi ukuqasha, kodwa okwamanje usazisebenzela yedwa. Utshele ILANGA ukuthi unesifiso sokuqasha abantu angakwazi ukusebenzisana nabo ukuze akwazi ukwenza umsebenzi omningi ngesikhathi.
Le nsizwa ithi kayifuni ukuphushwa wukuthi unina akayesekanga ngesikhathi ithatha isinqumo sokwenza lo msebenzi, kepha ifuna ukuphumelela ngokwenza umsebenzi osezingeni eliphezulu. Isizakhele inqwaba yabalandeli nasezinkundleni zokuxhumana ngomsebenzi wayo osezingeni eliphezulu.
“Isifiso sami esikhulu manje wukuzakhela igama njenge- pastry chef esezingeni eliphezulu KwaZulu-Natal naseNingizimu Afrika. Ngifisa nokuvula indawo yami ngiqashe abantu, ngibafundise umsebenzi wokuhlobisa lona mina engigcine ngizifundisa wona,” kusho uGugu.
Ikhuthaza intsha ukuba ivuke izithathe, ilandele amaphupho ayo. “Okubaluleke kakhulu wukusebenzisa lokho onakho ngaleso sikhathi. Uma umsebenzi wakho uwenza ngokuzimisela, impumelelo ugcina uyitholile," kusho yena.