Mayehliswe imimoya ngokuqanjwa kwezikhumulo
ISIPHAKAMISO sikahulumeni sokumema izakhamizi ukuba zibeke uvo lwazo ngokuqanjwa kabusha kwezikhumulo zamabhanoyi eNingizimu Afrika, sesikhuphule imimoya ngenxa yokungenelala kosopolitiki badunga izinhlelo zokuqhuba lolu hlelo.
Izikhungo ezithintekayo lapha yiCape Town International Aiport, iPort Elizabeth Airport, i-East London Airport nesikhumulo samabhanoyi esiseKimberly. Indaba isuswe ngumholi we-Economic Freedom Fighters (EFF), uMnu Julius Malema ngosuku lomngcwabo kaNkk Winnie Madikizela Mandela obungo-Mbasa (April), lapho etshele khona izihlwele ukuthi uhulumeni kufanele uqambe iCape Town International Airport ngokuthi yiWinnie Madikizela Mandela International Airport.
Isiphakamiso sikaMnu Malema, owayesondelene kakhulu noNkk Madikizela Mandela, sesiphazamise izinhlelo zeANC, yona ebihlose ukuba lesi sikhungo siqanjwe ngokuthi yiNelson Mandela International Airport kulo nyaka, ukuqondanisa nemigubho yokuzalwa kukaMnu Mandela eminyakeni ewu-100 lo mholi osewadlula emhlabeni, wazalwa.
Umbono we-EFF usuphikiswe ngabathile eWestern Cape, abathi bayisizukulwane sesizwe samaKhoi. Laba bona sebephakamise igama likaKrotoa okungowesifazane okuthiwa wayengutolika phakathi kwalesi sizwe nabamhlophe, ababeholwa nguJan van Riebeeck ngesikhathi befika eCape Town ngo-1652. Inkinga ngalolu daba wukuthi osopoliki sebengene nangesiphanga.
I-EFF yona kayifuni ngisho ukunika abangahambisani nayo ithuba lokuphefumula njengoba kwenzekile emhlanganweni womphakathi obuseCape Town kuleli sonto. Amalungu ayo nelinye iqeqeba ebeliphakamisa igama likaKrotoa, bacishe bazwana amandla, kwaze kwalamula onogada kwamiswa nomhlangano - wangabe usaqhubeka. Ukuqanjwa kabusha kwendawo noma isikhungo kufaneke kube yisinqumo esidala umoya wobumbano kubantu, hhayi kube yisizathu esiqubula ingxabano nenzondo phakathi kwezinhlanga.
Inkinga ngalesi siphakamiso wukuthi sesivuse uhlevane phakathi kwezinhlanga, lapho umphakathi wamakhaladi eCape Town uthi uzizwa ungeyona ingxenye yaleli lizwe ngoba izimvo zawo zishaywa indiva ngisho eWestern Cape, lapho uyiningi khona. Kunombono wokuthi abampisholo bafuna kuhlale kukhala isicathulo sabo kuyo yonke imikhakha yempilo, ngisho nasezindaweni ezifana neCape Town lapho bebancane khona ngesibalo.
Umnyango wezokuthutha, okuyiwona owengamele udaba lokuqanjwa kabusha kwezikhungo, kufanele uqinisekise ukuthi yizwi labantu emazingeni aphansi eliba nesisindo kulolu daba, hhayi amaqembu epolitiki. Noma kuyiqiniso ukuthi ukuqanjwa kwesikhungo samabhanoyi wudaba olungaphansi kukahulumeni kazwelonke, kodwa kubalulekile ukuba okushiwo ngabantu bakulesiya sifundazwe kulalelwe, kungabekwa phambili imibono yabantu abahlala eGauteng, ukwenza isibonelo.
Kungakuhle futhi ukuba uma kuqanjwa kabusha izindawo kubhekwe namagama amaqhawe namaqhawekazi abamba iqhaza kweminye imikhakha yempilo, njengezemidlalo, ezamaciko nokunye.