Kungenzeka akhuze ibuya uKhuzeni?
Bathi impumelelo kaMnu Zikalala isiyafana nokulindela usuku ukuba imenyezelwe
NJENGOBA luqala kusasa ngoLwesihlanu eKing Dinuzulu Hall, e-University of Zululand, KwaDlangenzwa, eMpangeni ukhetho lobuholi be-African National Congress (ANC) KwaZulu-Natal, umbuzo osemiqondweni yeningi elilandela izindaba zombusazwe ngothi kungenzeka yini akhuze ibuya uMnu Sihle Zikalala nezakhe.
Kuzokhumbuleka ukuthi isinqumo senkantolo ecaleni elalifakwe wuhlangothi obelweseka uMnu Senzo Mchunu kwesikasihlalo we-ANC KwaZulu-Natal, sasithi ubuholi bohlangothi oluholwa nguMnu Sihle Zikalala kabukho emthethweni.
Ukusondela kwesikhathi sengqungquthela ye-ANC kuzwelonke ebiseNasrec, eGoli ngonyaka ofile, kuphoqe ukuba kuthathwe isinqumo sokuba luhlehle ukhetho lwaleli qembu kulesi sifundazwe, kwase kubekwa isigungu sesikhashana esibunjwe ngamalungu aqhamuka kuzo zombili izinhlangothi ezibangayo.
Sekuwumlando ukuthi imiphumela yaleyo ngqungquthela ilandelwe yizinguquko ezimqoka, phakathi kwazo okube wukushenxiswa kukaMnu Jacob Zuma kwesokwengamela iNingizimu Afrika emuva kokunqoba kukaMnu Cyril Ramaphosa kwesokwengamela i-ANC.
Sekuwumlando futhi ukuthi uMnu Zuma ukukhombisile ukuba ngumafavuke njengedangabane ngokuphumelela ukuhlenga impilo yakhe yezombusazwe emuva kokuba kade exoshwe ngowayengumengameli ngaphambi kwakhe, uMnu Thabo Mbeki.
Njengoba selufikile ukhetho lobuholi be-ANC KwaZulu-Natal, kuyezwakala ngezimbobo zomuhlwa ukuthi kungathi uhlangothi olweseka uMnu Zikalala, luhamba phambili ezifundeni eziningi.
Nakuba i-ANC ikuphika ukuthi usekhona umdonsiswano wezinhlangothi ebezikhona ngaphambi kwengqungquthela kazwelonke eNasrec, kodwa uku- phumelela kukaMnu Zikalala kuyosho lukhulu.
Izinkulumo zakhe emphakathini zikubeka kucace ukuthi uhla- ngothi akulona lweseka uMnu Zuma ezikhalweni anazo ngokukhishwa kwakhe (uZuma) esikhundleni sokuhola leli lizwe engakaliqedi ihlandla lakhe -obekungelokugcina ekusona.
ILANGA like laxhumana noMnu Mhlaba Memela, osehhovisi leANC KwaZulu-Natal, ukuzwa ukuthi yini eqhubekayo okhethweni lwezifunda kuleli qembu. Libuye lilambatha njengoba ethe kuhlelwa isigcawu sabezindaba esizoba kusasa ngoLwesihlanu lapho kuzochazwa khona konke okwenzekayo ngokhetho.
Umhlaziyi wezepolitiki, uSolwazi Bongile Mayaba, weBMM Incorporated - ethintwa yi
ngalolu daba - uthe ubona sengathi impumelelo kaMnu Zikalala, isiyafana nokulindela nje usuku ukuba imenyezelwe.
Phakathi kwezinye zezizathu zalokho, uthe wukuthi kungenzeka umshikashika wokwakha ubumbano uholele ekubeni kube nesinqumo se-ANC sukuthi uMnu Zikalala angabangiswa kwesikasihlalo bese uMnu Mike Mabuyakhulu engenela esokuba yiphini likasihlalo.
Ngaphezu kwalokho, ukuphumelela kohlangothi lukaMnu Zikalala akukwazi ukuguqula iqiniso elithi ngokomthethosisekelo waseNingizimu Afrika, uMnu Zuma ngeke esabuyela ahole leli lizwe.
Kunjalo nje, ithikithi leRadical Economic Transformation (RET) ekade lithwelwe ngeqoma wuhlangothi olweseka uDkt Nkosazana Dlamini-Zuma engqungqutheleni ebiseNasrec, kalizange lisize ekubeni anqobe ukhetho lwesikamengameli, ngakho kakubonakali kuzobasebenzela namanje labo abafuna ukumephuca amavoti uMnu Cyril Ramaphosa ngokhetho oluzayo‚" ngokusho kukaSolwazi Mayaba.
"Indaba yeRET yinto ekhulunywa ngomntakabani, abanolwazi ngayo kanti iningi labalandeli kaliyiqondi kahle njengabo,” kusho uSolwazi Mayaba.
Uthi konke lokhu kwenza kubonakale kungekho okuzovimba uMnu Ramaphosa ekuthini aqhubeke nomsebenzi wakhe.