Abazithathela umhlaba bafanelwe yisibhaxu
NGIVUSWE wumsindo wequlu letoyitoyi ekuseni ngovivi ngoMsombuluko likhuza ohhayihhayi, onyamazane nonxakanxaka.
Bengizwa nje ukuthi lo msindo kawukho kude negceke lami. Ngivukile ngayobheka.
Yekanini sengithola abantu bephethe amapiki namafosholo, amapulangwe nothayela, beyinyova khona phambi kwendlu yami. Ngithe uma ngisondela, bangibuka, nami ngababuka, ngasengibabuza ukuthi bafunani bengivusa ngisazilalele kamnandi embhedeni wami.
Bathe bafuna indawo yokwakha njengoba uhulumeni usulikhiphile elokuthi useshaye umthetho wokwemuka abantu umhlaba ngaphandle kwesinxephezelo. Ngibatshele ukuthi lowo mthetho kawukashaywa, usadingidwa ephalamende.
Ngibuze ukuthi kodwa-ke yimuphi lo mhlaba abazowutha- tha, base bekhomba igceke lami basho nokuthi akekho umuntu ongaba nodedangendlale wegceke elingaka bona bengenandawo yokuhlala.
Kuthe mangihleke kodwa ngazibamba ngoba nakhu ngibona phela ukuthi bangalufohloza nalolu thango olusihlukanisile, bangenze isilo sengubo ngala mapiki namafosholo abebewaphethe.
Ngibatshele ngokukhulu ukuzithoba lokhu ukuthi cha umhlaba wona ngowami futhi ngawukhiphela eshisiwe imali lena, ngakho ngeke bafike nje bona bathi bayawuthatha.
Esinye isiwengu siqalile ukugoloza, sizama ukuhlohla abanye, sathi uma bethanda bangaluwisa lolu thango bakhe imikhukhu yabo futhi akukho engingakwenza.
Ngibatshelile nami ukuthi uma benza njalo kuyobe bayahlasela, kanti umthetho uyangivumela ukuba ngingene endlini, ngiphume nomagazini wami, ngibawise uyaca.
Ngijobelele ngathi phela akukhona eZimbabwe lapha, futhi kasinazo lezi zidlova okuthiwa amavethelele, zibe zalwa impi eseyaphela kudalo. Ngithe uma befuna ukulibona ngosi ivethelele, ngizobabonisa lona emini kwabha.
Ngibatshelile futhi nokuthi mina ngidabuka kwelikaMthaniya, kanti impi kasiyesabi. Ngizwe omunye esesho ethi: “hhayi yiZulu leli, asiliyeke, laba bantu bathanda ukulwa”.
Nami ngase ngijobelela ngisho nokuthi ilenki yamatekisi kayikho kude, ngingamane ngithi tshobe ngokhalo, ngibuye nezakhithi izinsizwa, simane siqede nje ngabo.
Baxebuke ngamunye okwesikhokho sesilonda uma sinwaywa. Ngishayele abakwasidlodlo ngabatshela ngale nsuma- nsumane. Sebebaningi labo abazithathela umhlaba ngodli, ikakhulukazi eGauteng, bebe bengazi nokuthi lo mthetho omusha odingidwayo uthini, usuka kuphi futhi uyaphi.
Lo mthetho uzonika uhulumeni amalungelo okwemuka abantu umhlaba, hhayi noma ngubani nje. Nalapho futhi kuzoba nemigomo ebekiwe, ecacisayo ukuthi umhlaba lona uthathwa kanjani, kutheni.
Lezi ziwengu zona zizibona seziwuhulumeni msalofu, ziyazibusa sengathi leli lizwe kalinamithetho, futhi kalinahulumeni ophethe.
Kumele uSilili lona ngimlume indlebe asheshe ayigweme le nto ezokwenzeka ngoba phela kuzochitheka igazi.
Phela uma sonke sesizibusa, singalawulwa wumthetho, yonke into izolungiswa ngezikhali. Ngithe uma ngitshela umndeni wami ntambama ngokwenzekile, indodana yami yathi yona izozithathela igumbi lokuphola negceke langemuva lapho izokwakha khona inkundla yebhola.
Ngayitshela ukuthi angithi umagazini wami iyawazi, kanti izinhlamvu angizeswele, ugebhezi lungahlephuka nje kungabi ndaba zalutho.
Sebeyothi bengibopha abomthetho, yena uyobe esephuza itiye noJesu lena emafini ngoba phela kangikholwa ukuthi usakhumbula yini ukuthi iwayini lenziwa kanjani.
Phela sesiside lesi sikhathi aphendula amanzi wawenza lona iwayini. Izinto zishintshile manje, mhlawumbe nje noSathane useyakwazi ukushintsha amanzi awenze ugologo obizayo, lona okuthiwa yisingili.
Phela lo mlisa akathandi ukwehlulwa. Laba abazithathela umhlaba, ake balinge nje bazame ukuthatha umhlaba weSilo, bayowukhomba onotshwala.