I-TUNISIA NESHOBOLO LOKUPHUMA EKUSENI KWI-WORLD CUP
SEKUSELE isinsuku ezingu-7 nje kuphela ukuba kuqale ushikishi lwemidlalo yeNdebe yoMhlaba ngoLwesine oluzayo isongwe mhla ka-15 kuNtulikazi (July) kophezulu eRussia. Sesiyela emaphethelweni okuhlaziya amazwe ngokwamaqoqo adidiyelwe kuwona. Namuhla sibheka iGroup G okuyiqoqo elandulela elokugcina. Kuleli qoqo kuboshelwe iBelgium, iPanama, iTunisia ne-England.
IBelgium yase-Europe:
IBelgium ingelinye lamazwe abophele izibabuli zabadlali ezingakwazi ukuphendula amatafula kulo mqhudelwano. Leli lizwe lidlale kahle emidlalweni yokuhlunga njengoba liqede liqhwakele kwiGroup H, futhi lingayazi nhlobo induku.
Liqede linamaphuzu angu-28, linamagoli angu-43 emidlalweni engu-10. Nokho-ke iBelgium na-kwi-Euro 2016 idlale kahle emidlalweni yokuhlunga kodwa yashaya udaka emqhudelwaneni obuseFrance.
IBelgium yiyona okulindeleke ukuba iqede iqhwakele kuleli qoqo ngenxa yokubophela abadlali bezi-nga eliphezulu. Nokho-ke isamincile ngoV- incent Kompany olimale ngeledlule bedlala ngokulingana nePortugal kuba ngu0-0 kowobungani. Yize lo mdlali elimele kodwa kulindeleke ukuba ahambe naleli lizwe kulo mqhudelwano. UKompany weManchester City yase-England noJan Vertonghen weTottenham Hotspur yase-England, yibona abawukhonkolo weBelgium.
Okugqamile ngesikwati seBelgium, wukushiywa ngaphandle kukaChristian Benteke. URobero Martinez ongumqeqeshi weBelgium, uncamele ukuhamba noMichy Batshuayi weChelsea noDries Mertens weNapoli, abazolekelela uRomelu Lukaku weManchester United.
IBelgium iteketiswa ngele-The Red Devils.
Isikwati seBelgium esiya kwiNdebe yoMhlaba sididiyelwe kanje, onozinti: Koen Casteels, Thibaut Courtois noSimon Mignolet.
Abasemuva: Toby Alderweireld, Dedryck Boyata, Vincent Kompany, Thomas Meunier, Thomas Vermaelen noJan Vertonghen. Abasesiswini: Yannick Carrasco, Nacer Chadli, Leander Dendoncker, Kevin de Bruyne, Mousa Dembele, Marouane Fellaini, Eden Hazard, Thorgan Hazard, Adnan Januzaj, Youri Tielemans no-Axel Witsel.
Abagadli: Michy Batshuayi, Dries Mertens noRomelu Lukaku.
I-England yaseEurope:
I-England ingelinye lamazwe okulindeleke ukuba adlulele emzuliswaneni olandelayo kulo mqhudelwano. Nokho-ke izingqapheli zithi amfiliba amathuba okufinyelela kuma- semi- final ngenxa yokushoda ngezikhwishikhwishi zabadlali. Lesi sikwati sizokube siholwa nguHarry Kane oyisilomo seTottenham Hotspur.
UGareth Southgate ongumqeqeshi we-England, uthuse abaningi eshiya ngaphandle uJoe Hart ongunozinti osemnkantshubomvu waleliya lizwe.
Lo mqeqeshi uphinde washaqisa abalandeli bebhola base-England edidiyela esikwatini sakhe abadlali abangakaze balimele iqembu lesizwe, okubalwa kubona uTrent Alexander-Arnold noNick Pope, kanti ufake noRuben Loftus-Cheek ochithe isizini yonke engadlali kwiCrystal Palace.
I-England ikhishwe esigabeni samaqoqo kwiNdebe yoMhlaba eBrazil, ngemuva kokuhlulwa yiItaly ne-Uruguay.
Ibigcine ukukhishwa esigabeni samaqoqo ngo-1958. Iphinde yaphoxa iwashiswa ijezi yi-Iceland kungazelele muntu kwi-Euro 2016 eFrance. Lokhu kuholele ekutheni azibeke phansi izintambo uRoy Hodgson obengumqeqe-shi. I-England igabe ngoKane, uRaheem Sterling, uDeli Alli, uDanny Welbeck nabanye abaningi.
Muva nje, i-England ihlule iNigeria ngo-1-0 kowobungani. I-England iteketiswa ngele-The Three Lions.
Isikwati se-England esiya kwiNdebe yoMhlaba, onozinti: Jack Butland, Jordan Pickford noNick Pope.
Abasemuva: Trent AlexanderArnold, Gary Cahill, Phil Jones, Harry Maguire, Danny Rose, John Stones, Kieran Trippier, Kyle Walker no-Ashley Young.
Abasesiswini: Eric Dier, Dele Alli, Jordan Henderson, Fabian Delph, Jesse Lingard noRuben Loftus-Cheek.
Abagadli: Harry Kane, Marcus Rashford, Raheem Sterling, Danny Welbeck noJamie Vardy.
ITunisia yase-Afrika:
ITunisia cishe yizwe eligqemeke ingozi engeqiwa ntwala kwa-ngu-32 azobamba iqhaza kwiNdebe yoMhlaba. Leli lizwe lilinyalelwe yisethenjwa uYoussef Msakni ozohlala izinyanga eziyisithupha engalikhahleli ibhola. Lo mdlali ulimale ikilabhu yakhe, i-Al-Duhail ibhekene ne-Al-Sailiya koweligi yaseQatar. UNabil Maaloul ongumqeqeshi weTunisia ebuzwa ngokulinyalelwa yilo mdlali, uthe kufana nse nokuthi i-Argentina iye kulo mqhudelwano ngaphandle kukaLionel Messi oyisethenjwa.
Isikwati seTunisia sikhandwe ngabadlali abazalelwe emazweni angaphandle, ikakhulukazi abadabuka eFrance.
UMaaloul, obengumsizi kaRoger Lemerre obecija iTunisia inqoba i-African Cup of Nations ngo2002, unikwe lo msebenzi ngemuva kokushenxiswa kukaHenri Kasperczak.
Lo mqeqeshi udlalele iTunisia kusukela ngo-1985 kuya ku-1995, kanti unconywa kakhulu ngokuguqula iTunisia ekubeni yizwe elipaka ibhasi.
ITunisia yangena okokuqala kule midlalo ngo-1978 yase ibamba iqhaza kulandelana kweyango-1998, ngo-2002 nakweyango-2006. Nokho kuyo yonke le midlalo kayikaze idlulele esigabeni somkhumulajezi.
ITunisia ibukeka izobanga ukudlulela esigabeni esilandelayo ne-England njengoba kubhekwe ukuthi iBelgium iqede iqhwakele kuleli qoqo. ITunisia iteketiswa ngele-The Eagles of Carthege. Isikwati seTunisia esiya kwiNdebe yoMhlaba sididiyelwe kanje, onozinti: Farouk Ben Mustapha, Moez Hassen no-Aymen Mathlouthi.
Abasemuva: Rami Bedoui Etoile du Sahel, Yohan Benalouane, Syam Ben Youssef, Dylan Bronn, Oussama Haddadi, Ali Maaloul, Yassine Meriah noHamdi Nagguez.
Abasesiswini: Anice Badri, Mohamed Amine Ben Amor, Ghaylene Chaalali, Ahmed Khalil Saifeddine Khaoui, Ferjani Sassi, Ellyes Skhiri, Naim Sliti noBassem Srarfi.
Abagadli: Fakhreddine Ben Youssef, Saber Khalifa noWahbi Khazri.
IPanama yaseNorth America:
Akukho okutheni okulindeleke kwiPanama njengoba izokube iqala ukubamba iqhaza kwiNdebe yoMhlaba. Ukuboshelwa eqoqweni elilodwa neBelgium ne-England, kwenza kulindeleke ukuba iphume ekuseni kulo mqhudelwano. Isihluleke amahlandla alishumi kulandelana ukungena kule midlalo. Nokho-ke kungenzeka kube khona ebajikela esiswini njengotshwala njengoba yenzile ikhipha i-United States of America (USA) kweyokuhlunga.
Leli lizwe lithembele kakhulu kuGabriel Torres oqale ukudlalela iqembu lesizwe eneminyaka engu16 ubudala, kanti uke wafunwa yiManchester United yase-England. Leli lizwe licijwa nguHernan Gomez othathe lo msebenzi ngo2014. Ubesule esikhundleni sokuqeqesha iColombia ngemuva kokuhlasela owesifazane ngaphandle kwendawo yokucima ukoma eBogota. IPanama iteketiswa ngele-The Canal Men.
Sesisonke isikwati sePanama esiya kwiNdebe yoMhlaba sididiyelwe kanje, onozinti: Jose Calderon, Jaime Penedo no-Alex Rodriguez.
Abasemuva: Felipe Baloy, Harold Cummings, Eric Davis, Fidel Escobar, Adolfo Machado, Michael Murillo, Luis Ovalle noRoman Torres.
Abasesiswini: Edgar Barcenas, Armando Cooper , Anibal Godoy, Gabriel Gomez, Valentin Pimentel, Alberto Quintero noJose Luis Rodriguez. Abagadli: Abdiel Arroyo, Ismael Diaz, Blas Perez, Luis Tejada noGabriel Torres.