ABAHLAZIYI BE-COMRADES BAYIFAKA KU-GERDA STEYN IMALI

ABAHLAZIYI bezokugijima KwaZulu-Natal bathipha uGerda Steyn ukuthi uzokhala emuke nesicoco seComrades Marathon yanonyaka ezokuba ngeSonto kusuka ngo05h30 eCity Hall yaseMgungundlovu isongwe eMoses Mabhida Stadium, eThekwini.

Ukuthwalwa ngeqoma kukaSteyn kulandela ukunqoba kwakhe iTwo Oceans Marathon nonyaka kanti ungene endaweni yesine kwiComrades nyakenye.

UCuan Walker weMaxed Elite noXolani Mabhida we-Arthur Ford, basho ngazwi linye ukuthi uGerda uzowunqoba kumnyama kubomvu lo mjaho. Ukwenza kahle kukaSteyn, oqale ukugijima ngo-2015, yikhona okumenza imfivilithi nonyaka.

“Ukuhoxa kukaCamille Herron obe yingqwele nyakenye, yikhona okungenza ngisho ngingahlonizi ukuthi uSteyn uzowunqoba lo mjaho.

"Nokungabi bikho kukaCaroline Wostmann kwenza ngingamboni omunye umsubathi kwabesifazane ongaphazamisa uSteyn.

"Kangibabukeli phansi laba abakhona kodwa lo msubathi ulikhuphule kakhulu izinga lakhe,” kusho uWalker naye ozokube egijima ngeSonto.

Uhoxiswe wukulimala uCamille ngemuva kokuba egijime kakhulu kwazise nonyaka wenze i-100km, i-50km ne-24miles ukubala nje imijaho embalwa.

UMabhida uyale abasubathi ngokuthi ukuze benze kahle kwiComrades, kufanele baziqeqeshe ngokwanele. Uthi angajabula uma abasubathi baKwaZulu-Natal ikakhulukazi abesifazane bengaba ne-training camp lapho kuzokube kukhulunywa ngezinto ezithinta ukugijima.

Laba ongoti babe sebethipha abasubathi abawu-10 abangase bangene nabokuqala abalishumi kulo mjaho. Babona bezongana ngokulandelana kanjena:- uSteyn, uCharne Bosman, uSarah Bard, u-Ann Ashworth, uTanith Maxwell, uNina Zorina, u-Alexandra Morozova, uStephanie Smith, uFikile Mbuthuma noDevon Yanko.