I-Iron Duke ibhoboza ithumba ngoKhuzwayo
Itshele ILANGA ukuthi seyiqede konke nalo nozinti
UGCINE elibhobozile ithumba u-Irvin “Iron Duke” Khoza, onguSihlalo we-Orlando Pirates, ngoBrilliant “Casillas” Khuzwayo osanda kulaxaza iKaizer Chiefs obekungaqondakali ukuthi ulibhekisa kuphi.
Indaba kaKhuzwayo isematheni njengoba ephumele obala ukuthi uyayishiya le kilabhu asehlale kuyona iminyaka.
Akazange akucacise ukuthi ulibhekisa kuphi ngenxa yokuthi usengumdlali weChiefs kwazise inkontileka yakhe nayo iphela ekupheleni kwenyanga. Bekunokudideka ukuthi lo mdlali ulibhekisa kephi njengoba ekhonjwa kwiPirates, abanye bethi uya kwiCape Town City.
Engxoxweni ekhethekile uKhoza abe nayo neLANGA izolo ngoLwesithathu ekuseni, ubhoboze ithumba ngoKhuzayo.
Leli phephandaba libuza uKhoza ukuthi kuliqiniso kangakanani ukuthi sebesayinise uMishack Maphangule odlala kwiBlack Leopards inkontileka yeminyaka emithathu, uphendule ngokukhulu ukwethuka, wabuza ukuthi liyithathaphi le ndaba leli phephandaba ngoba isafihliwe.
Limuphendula ukuthi liyithathephi, ube esethi:
“Khohlwa yindaba kaMaphangule, sisaxoxa nomphathi wakhe okunye asikakuqedeli. Kudala ngagcina ukukupotshozela izindaba, wothi ngikunike into eqondile ngalo mfana walapho eNatali, uKhuzwayo, uzokube evimbela thina ngesizini ezayo. Sesimsayinisile. Uwena umuntu wokuqala engimutshela le ndaba, ivela ngqo kimina hhayi inzwabethi.”
Uqhube ngokupotshoza nokunye ngalo mdlali kodwa wacela ukuba kungadalulwa ngoba ethi akafuni ukususa umsindo.
Ebuzwa ngekusasa likaThamsanqa “Gandaganda” Gabuza noAyanda “Malume” Gcaba abaphelelwa yizinkontileka nale kilabhu uma kusongwa le nyanga, uthe:
“Laba badlali basengabePirates. Inkontileka lapha kwi-Pirates kayipheli ungakaxoxi nami savumelana ngokuthi kwenzakalani. UGcaba noGabuza ngizohlangana nabo ngoLwesihlanu. Cishe ngesonto elizayo kuzokuba nento eqondile ngabo.”