UCELA USIZO UNINA WOKHUBAZEKILE
UCELA usizo unina wentombazanyana eneminyaka ewu-4 ubudala, waseMayville, eThekwini, ezalwe ingenayo imilenze nengalo, okumanje kuthiwa isiyazicelela ukuya esikoleni kwazise izingane ezingontanga bayo zihamba inkulisa.
UNkz Gezile Mhlongo (22), ongunina ka-Owami Mhlongo, uthi isifiso sakhe esikhulu wukuthola uxhaso indodakazi yakhe ithole isikole esiyifanele ukuze ikwazi ukufunda iphinde ihlale endaweni ephephile ngoba lapho behlala khona kayiphephile, kwazise kusendaweni ekude nanomgwaqo.
Uthi ngesikhathi eyobeletha wayengazi ukuthi indodakazi yakhe ikhubazekile, wabona ngoba odokotela sebeyibeka ezandleni zakhe.
“Ngifisa ukuthi ahlale endaweni ephephile akwazi nokufunda nezingane ezinjengaye. Ngiyafisa afunde kodwa manje kangizazi nezikole ezilungile engingamfaka kuzona lapho sizohlala khona ngoba ngesaba ukuthi uma ngimyisa enkulisa esendaweni, mhlawumbe ngeke ba- kwazi ukumphatha ngendlela.
“Okunye okungiphatha kabi, wukuthi usekhulile futhi uyezwa noma abantu bekhuluma kabi ngaye afike angitshele,” kusho unina.
Uthi akafisi ukuthi ingane yakhe ikhule izibone icwaseka noma ibe nokuphatheka kabi. Uma emchaza u-Owami, uthi uyindodakazi ekhuthele, ethumekayo, ethanda ukuzula iphinde idlale nezinye izingane.
“Noma ehamba kabuhlungu ka- ngaka kodwa uyakuthanda ukuzula nokuyodlala nezinye izingane. Ngibuye ngisabele ukuthi usengalimala noma yinini ngoba ubuye ahambe ezindweni eziyingozi ngoba ebona ezinye izingane zihamba, bese ewa kabuhlungu.
“Noma engakaze alimale kanzima, kodwa kangifisi ukuthi alimale,” kusho uNkz Mhlongo ofunda umatikuletheni ngemuva kokuhlala ekhaya iminyaka emibili esethole umntwana.
Njengamanje u-Owami uholelwa ngunina imali yesibonelelo sabakhubazekile athi yiyona mali abaphila ngayo ngoba nakubo kakusebenzi muntu njengoba yena efunda.
“Yize enaso isihlalo esihambayo, kodwa siyasinda futhi ngifika kanzima naso endlini. Kuze kube lula ukuthi ngimbelethe kunokuthi ngehle ngenyuka nesihlalo,” kusho uNkz Mhlongo.
Uthi u-Owami ukhuthele, uyakwazi ukuzidlela, wukuzama ukubhala, wukushanela aphinde akwazi nokuzigqokisa.
“Ngasekuqaleni kwesonto eledlule bengimyise esibhedlela azalelwa kusona iKing Edward, eyobhekwa ngodokotela ukuthi bangamfakela yini izinyawo ukuze okungenani akwazi ukuhamba,” kusho uNkz Mhlongo.