Bathi kuyisibusiso ukulingisa kwiMbewu
Amawele aphinde abe nekhono lokucula
AGABE nangeziqu zemfundo ephakeme amawele angabalingisi ababalwa nabahamba phambili emdlalweni owuchungechunge ofike kwezwakala kumabonakude, iMbewu: The Seed. Lo mdlalo ukhonjiswa njalo kwi-e.tv ngoMsombuluko kuya kuLwesihlanu ngo-21h30.
La mawele okunguNokubonga Khuzwayo 34), oneziqu zeAccounting nodadewabo uNokwanda onezeElectrical Engineering - abazithole eMlazi BB Coastal College, - adabuka eMlazi kanti azakhele udumo emdlalweni weshashalazi, iThe Lion King South Africa. Zikhuluma neLANGA lezi zintokazi, zithi bezingazi ukuthi zinekhono lokulingisa nelokucula.
Bezijwayele ukucula esontweni. Zithi bezingazitsheli ukuthi ngelinye ilanga zingagcina zithole indawo kwiLion King South Africa. Ngaphami kokuba zingene kwiLion King, zingenele umncintiswano womculo iPop stars ngo2003, kodwa zangaphumelela. Ziphume ekuseni. Yize kunzima ukuzehlukanisa lezi zintokazi - uma uzibhekile - kodwa okugqamayo wukuthi uNokubonga uyazikhulumela kanti uNokwanda uzothile.
UNokubonga udlala indawo kaZakithi oyindodakazi kaZimele Bhengu (Mpumelelo Bhulose) oyinjinga enenkampani kawoyela, iMaluju - eyibamba leChief Executive Officer - kanti uNokwanda udlala ekaFuthi ozalwa ngumfowabo kaZimele, uPhakade, ongumfundisi.
UNokubonga utshele ILANGA ukuthi indawo ayidlalayo kwiMbewu yehlukile kakhulu kunaye njengoba yena engumuntu olungile futhi engathandi ukuzwisa abanye abantu ubuhlungu, enjalo nje uyehluleka wukuthi cha.
“Ngelinye ilanga ngizibona ngisezicathulweni zikaZakithi ngoba ngiyathanda ukuba ngumuntu wesifazane osemandleni futhi osesikhundleni esithile,” kusho uNokubonga.
“Ukuba ngamawele kuyinto exakile kithina njengoba sithanda izinto ezifanayo futhi sizwana ngendlela eyisimanga. Indlela esenza ngayo izinto ungafunga ukuthi singumuntu oyedwa. Isikhathi esiningi kakujwayelekile ukuba amawele azwane ngendlela esizwana ngayo.
"Thina siyathandana futhi kasicikani, siyakujabulela ukuba ndawonye. Sikhule singabangani futhi sihlala sobabili. Ngikhumbula ngesikhathi ngiqala kwiLion King S.A ngo2007, ngihambe ngaya phesheya ngaba nenkinga ngoba iwele lami belingekho eduze kwami,” kusho uNokubonga.
UNokwanda uthi njengoba belingisa, kabakaze bazenze izifundo zokulingisa. “Yize sineziqu zalezi zifundo esinazo, kangikhumbuli sithola umsebenzi walokhu esikufundele, kodwa sibe nenhlanhla yokuba sithole indawo emdlalweni omkhulu kangaka (Imbewu).
"Ngiyacabanga ukuthi ukulingisa nokucula bekuwubizo lwethu. Emuva kokuvela kumaPop Stars, sibe nenhlanhla njengoba silandwe ngomunye ubhuti wathi siyoqala umdlalo weshahalazi eGoli,” kusho uNokwanda. Bathi emsebenzini abawenzayo isikhathi kasikho ngenxa yokuba matasa.
Batshele ILANGA ukuthi kunzima emkhakheni abakuwona njengoba abanye abantu besifazane umsebenzi bewuthola ngokulala nabadidiyeli noma nophrojusa. “Kasikukhuthazi ukuba abantu besifazane bazehlise isithunzi ngalolu hlobo. Noma ngabe kuthiwa umuntu uphuma ekhaya elinjani, kumele angasivumeli isimo sakubo ukuba simenzise into angezwani nayo nemehlisa isithunzi.
Uma kwenziwa izinhlolokhono, akubona bonke abantu abazophumelela, uma ungaphumelelanga kumele uqhubeke uzame uze uphumelele, ungadikibali ngoba isikhathi sakho sisuke singakafiki,” kusho uNokubonga evunyelwa ngudadewabo.
Bathi ukuba kwiMbewu: The Seed, kube yisibusiso empilweni yabo ngoba bayaqala ukulingisa kumabonakude njengoba begxile emidlalweni yezeshashalazi.