Usinde izigebengu zisho ukumqeda
Olwa nokuhlukunyezwa kwabesifazane nezingane
UPHUNYUKE emlonyeni wengwenya owesilisa waseMtubatuba, odume ngokuxwayisa abantu ngokuhlukunyezwa kwezingane nabesifazane, ehlaselwa ngabantu abangaziwa esohambeni lwakhe ngeledlule.
UMnu Jan Mabuyakhulu ( osesithombeni) - owaziwa kakhulu ngokuhamba amabanga amade ngezinyawo exwayisa ngokuhlukunyezwa kwebesifazane nezingane - uthi namanje akazi usinde kanjani kula madoda abethi ayamqeda ngommese ngaseRichards Bay.
Kwenzeka lokhu nje, usohambeni lwakhe olusuka eMtubatuba uya eThekwini, aluqale ngeledlule kanti kulindeleke ukuba atheleke kusasa ngoLwesibili kwelikabhanana.
Kulo mkhankaso uMnu Mabuyakhulu usuke ephethe izingqwembe ezibhalwe ukuthi makuyekwe ukuhlukunyezwa kwezingane nabesifazane.
“Ngesikhathi ngihlaselwa yila madoda, bengibheka indawo lapho ngizoquba khona kuze kube sekuseni bese ngiqhubeka nohambo. Ngithe ngingazelele, ngabona amadoda amabili abengilandela ngazitshela ukuthi ngabantu abaphuma emsebenzini, bayazihambela.
“Bathe uma befika kimina, oyedwa wabo wangidonsa, bangitshela ukuthi mangikhiphe yonke imali enginayo. Ngizamile ukudlubulundela kodwa oyedwa wabo wakhipha ummese esho ukungiqeda ngawo.
“Ngishiye konke ebengikuphethe, okubalwa izingqwembe engihlale ngiziphethe, omakhalekhukhwini ababili nemali engango-R600 esale kwebengiyinikwe wuMasipala waseMtubatuba - yokuba ngithole ukudla endleleni - umazisi wami nezimpahla zokushintsha uma ngisendleleni,” kusho uMnu Mabuyakhulu.
Uthi uyile emaphoyiseni eyobika ngalesi sigameko kodwa watshelwa ukuthi makabuye esephethe ibhokisi lomakhalekhukhwini namaphepha akhombisa ukuthi ngabakhe.
Okhulumela amaphoyisa KwaZulu-Natal, uLt Col Thulani Zwane, uthe kubalulekile abantu bazi ukuthi uma webelwe umakhalekhukhwini, kumele uye nebhokisi namaphepha awo ukuze amaphoyisa ezokwazi ukuvula icala.
“UMabuyakhulu kumele aqinisekise ukuthi ubuyela esiteshini nebhokisi likamakhalekhukhwini ayovula icala. Uma engeneme ngendlela oluphathwe ngayo udaba lwakhe, kubalulekile ukuba axhumane nomphathi wesiteshi,” kusho yena.