"LE NSIZWA IYAKHOHLWA UKUTHI ZOLO LOKHU BESIYITHANDAZISA"
MHLELI: IsiZulu sithi ungagiyi ngethambo lenye indoda, uma nisempini usuyijuqile, uye uyimbathise isihlangu sayo bese uyicimezisa.
Siqhuba sithi ungalinge uyigwaze enye insizwa uma isilele phansi kodwa ilinde ivuke nibhekane ngeziqu nihlohlolozane, nidudulane kube ngongaphansi nongaphezulu, izihlwele nezethameli ziyosho zithi “hhiya muzi wakwethu idubukele”, sekuyoshiyana ukondla kwabafazi ekhaya lomunye nomunye.
Lowo oyochonywa uphaphe lwegwalagwala uyobe esebizwa ngeqhawe athole nezibongo zimuhashe ezinye izinsizwa. Ngithemeleza nje ngithintwa yile nsumansumane kaBrilliant Khuzwayo noBabes Wodumo (Bongekile Simelane), yindlabeyiphika phela le.
Le nsizwa iyakhohlwa wukuthi zolo lokhu besiyidabukela siyithandazisa ukuba inikezwe ithuba ibhinciselwe nxanye ngu-Itumeleng Khune ezintini zeKaizer Chiefs. Kwale noma i- agent yayo isishaya indesheni ithi icela ivinjiswe emidlalweni engatheni noma yemikhumulajezi, kodwa kwanhlanga zimuka nomoya.
Ibhentshi uKhuzwayo ulikhuhle, walipholisha, walishishiliza, waze wajokola wacela umaluju wathi kayingangaye, wahosha imfe. Yena namhlanje kunamahlebezi okuthi usephansi phezulu noBabes Wodumo udede kodwa uMampintsha (Mandla Maphumulo) usazama ukuzikhotha amanxeba.
Uma le ndaba iyiqiniso ngempela, kuyobe akenzisanga okwensizwa yangempela. Yebo kuthiwa ikhishwa esokeni, kodwa iye ikhishwe ngobunyoninco nobuchule obukhombisa ubusoka. Uma kuwukuthi akuwona amampunge ukuthi uthandana noBabes, simfisela inhlanhla.
Nokho-ke akugweme ukugwaza enye insizwa uma iguqile. Ulibele ephikelele ngokuthi bangabangani kodwa kuyasolisa ukuthi bambatha ngubo yinye nophu- malanga sikothe wakwaSimelane.
Umbuzo wami uthi uma ngempela bengabangani, yini indaba yabo ibhebhetheke okomlilo wequbula ngalesi sikhathi enye insizwa izilile, ikhala ibalisa ize ibe nesibibithwane.
Sonke lesi sikhathi bekuvimbeni uku- ba sazi ngobungani babo? Umfo kaMaphumulo (uMampintsha), makasiqonde isiZulu uma sithi “oseyishayile akakayo si, noseyosile akakayidli, oseyidlile udl’icala”.