Wakubona kudala uMbeki okwenzeka kwi-ANC
AKUYONA inhloso yale ngosi ukuphawula kabanzi ngamaqembu ezepolitiki nezinkinga zawo zangaphakathi, ngaphandle uma lezo zinkinga zingaba nomthelela ekuphathweni kwezwe nasempilweni yabantu.
I-ANC, iphethe amandla ombuso eNingizimu Afrika, ngaphandle kwesifundazwe iWestern Cape nomasipala abaningi bakhona abaphethwe yiDA, nomasipala abathile KwaZulu-Natal abangaphansi kwe-IFP.
Ukwengamela kwe-ANC uhulumeni kusukela kuzwelonke kuya komasipala, kuba nomthelela wokuba kuthi uma kunezinxushunxushu ezenzekayo ngaphakathi kuleli qembu, zibe nomthelela ongemuhle ekubusweni kwezwe, besekuphazamiseka nempilo yabantu abasuke bebheke ukuba uhulumeni wenze ngendlela imisebenzi yomphakathi.
Kule mpelasonto esiphuma kuyo, kubhuntshe ingqugquthela ye-ANC KwaZulu-Natal, phakathi kokunye ebizokhetha ubuholi baleli qembu kulesi sifundazwe.
Lokhu kwenzeke emuva kokuba abathile eqenjini befake isicelo enkantolo eNkulu eMgungundlovu ukuba imise le ngqungquthela ngoba bekhala ngokuthi kubenomkhonyovu owenziwe ngabathile ebuholini ngesikhathi kwenziwa amalungiselelo alo mhlangano.
Phakathi kokunye, kunezikhalo zokuthi amagama amanye amalungu aleli qembu kawaveli ohlwini lwabantu abangamalungu, okuthiwa bekuyitulo lokuba bangakwazi ukuba yingxenye yengqungquthela ekhetha ubuholi, khona kuzokhethwa abaholi abathile abadle- lana nalowo obengumengameli we-ANC nezwe, uMnu Jacob Zuma.
Kakungabazeki ukuthi umbango wobuholi beqembu kulesi sifundazwe sewube nomthelela wokubulawa kwamalungu aleli qembu nezinsolo - ezibukeka zinesisekelo - zokuthi kusetshenziswa imali yabakhokhi bentela ngokwabela amathenda anoju abathile ngenhloso yokuba badlulisele le mali kubaholi abathile.
Le ndlela yokwenza izinto inomthelela omubi empilweni yabantu ngoba inenkohlakalo nokwebiwa kwemali okufanele ngabe isetshenziselwa ukwenza izidingo zabantu nokuphucula impilo yoquqaba.
Kucacela ngisho ingane ukuthi isizathu sombango wezikhundla kwi-ANC kulesi sifundazwe kaku- ngoba labo abakhankasela lezi zikhundla behlose ukuba uma sebekhethiwe, basebenzele abantu, babanike impilo engcono.
Isizathu wukuba baphile impilo engcono bona, imindeni yabo neqeqebana elithile eqenjini nosomabhizinisi abadlelana nabo.
Okwenzeka manje kuleli qembu kwabonwa kudala yilowo owabe engumengameli walo, uMnu Thabo Mbeki owayeshumayela ukuba ubulungu baleli qembu bungavulelwa yinoma ngubani nje ofaka isicelo.
UMnu Mbeki wabe esaba ukuthi lokhu kungavulela amathuba izimpungushe ezifuna ukuba ngamalungu ngoba zihlose ukuthola izikhundla, besezisebenzisa lokhu njengesisekelo sokungena emazingeni kahulumeni, zikwazi ukulawula ukwabiwa kwemali okuzozinika ithuba lokuzicebisa zona nabangani bazo.
Ukucaphuna uMnu Mbeki; wayejwayele ukuthi kakubalulekile ukuba i-ANC ibe namalungu amaningi, kodwa okubalulekile wukuba lawo amancane akhona eqenjini abe sezingeni elifanele ( better fewer but better).
Sekuwumlando manje ukuthi emuva kokwehlulwa kukaMnu Mbeki nguMnu Zuma okhethweni lobuholi beqembu ngo-2007, amasango avulelwa noma ngubani ongenayo, isibalo samalungu eqembu sakhula ngesivinini.
Kuzophawuleka ukuthi yingalesi sikhathi lapho izinkinga eziningi zaleli qembu zaqala khona ukumila izimpande, ikakhulukazi KwaZulu-Natal.