ISENEGAL IYITHEMBA LE-AFRIKA E-RUSSIA
NJENGOBA imidlalo yeNdebe yoMhlaba iqala ngoLwesine eRussia, sibheka iGroup H okuyiqoqo lokugcina kulo mqhudelwano. Kuleli qoqo kuboshelwe iSenegal, iPoland, iJapan neColombia. Izingqapheli zikanobhutshuzwayo zithi iSenegal inethuba elihle lokudlulela emzuliswaneni olandelayo neColombia.
ISenegal yase-Afrika:
ISenegal ineminyaka engu-16 igcine ukubamba iqhaza kwiNdebe yoMhlaba. Izokube idlala okwesibili kule midlalo njengoba igcine ngo-2002 eKorea/Japan. Idlale kahle kulo mqhudelwano njengoba ikhishwe kuma- quarter final, kanti emdlalweni wokuvula ihlule iFrance ebivikela indebe.
ISenegal igabe ngabadlali abagijima emaligini ahlonishwayo emhlabeni.
Kulindeleke ukuba ithembele kakhulu kuSadio Mane weLiverpool, u-Idrissa Gueye we-Everton, uCheikhou Kouyate weWest Ham okungamakilabhu ase-England, uBalde Keita weMonaco yaseFrance nabanye.
UKouyate nguyena ongukaputeni weSenegal, kanti usephumele kaningi obala ngokuthi bafuna ukwenza kangcono kunabadlali abebeyibambe ngo-2002.
Okuhle ngeSenegal, wukuthi icijwa ngu-Aliou Cisse obengukaputeni waleliya lizwe kwiNdebe yoMhlaba ngo-2002. ISenegal ingene kulo mqhudelwano ngemuva kokunqoba imidlalo yokuhlunga kaGroup D, lapho ebiboshe- lwe khona neBafana Bafana, iBurkina Faso neCape Verde Islands. ISenegal ihlulwe yiCroatia ngo-2-1 kowobungani ngoLwesihlanu. Leli lizwe elingelinye lathwele amathemba e-Afrika kulo mqhudelwano, lizovula nePoland mhla ka-19 kwephezulu. ISenegal iteketiswa ngeleLions of Teranga. Isikwati seSenegal esiya kwiNdebe yoMhlaba sididiyelwe kanje, onozinti: Khadim Ndiaye, Abdoulaye Diallo no-Alfred Gomis. Abasemuva: Kara Mbodji, Kalidou Koulibaly, Moussa Wague, Saliou Ciss, Youssouf Sabaly, Lamine Gassama, Armand Traore noSalif Sane. Abasesiswini: Pape Alioune Ndiaye, Idrissa Gueye, Cheikhou Kouyate noCheikh N’Doye. Abagadli: Sadio Mane, Diao Balde Keita, Ismaila Sarr, Diafra Sakho, Moussa Konate, Mame Biram Diouf noMbaye Niang.
IColombia yaseSouth America:
Kuningi okulindeleke kwiColombia njengoba idlale kahle kwiNdebe yoMhlaba ngo-2014 eBrazil. Ikhishwe kuma- quarter final kulo mqhudelwano. IColombia ithembele kakhulu kuJames Rodriguez weReal Madrid yaseSpain embolekise kwiBayern Munich yaseGermany.
URodriguez nguyena okubhekwe ukuba ayithwale emahlombe iColombia nakulo mqhudelwano. Ngo2014 uhlabane ngomklomelo wokuhlohla amagoli amaningi njengoba evalele engu-6 emidlalweni eyisihlanu, ngaphambi kokuba bahlulwe yiBrazil ngo-2-1 kwi- quarter final. Lo mdlali uvalele elinye lamagoli ezinga eliphezulu bebhekene ne-Uruguay ngo-2014.
Unobhutshuzwayo ungenye yezinto ezihamba phambili kubantu baseColombia.
Ngo-1994 kudutshulwe u-Andres Escobar ngemuva kokuvalela igoli okube wumkhonto ogwaze ekhaya kwiNdebe yoMhlaba ebidlalelwa e-United States of America (USA) yanqotshwa yiBrazil ihlula i-Italy ngo-3-2 wamaphenathi kowamanqamu.
Lo mdlali udutshulwe ngumuntu obegula ngekhanda.
IColombia ilolongwa nguJose Pekerman, kanti iteketiswa ngeleThe Coffee Growers.
Isikwati seColombia esiya kwiNdebe yoMhlaba sididiyelwe kanje, onozinti: David Ospina, Camilo Vargas noJose Fernando Cuadrado.
Abasemuva: Cristian Zapata, Davinson Sanchez, Santiago Arias, Oscar Murillo, Frank Fabra, Johan Mojica noYerry Mina.
Abasesiswini: Wilmar Barrios, Carlos Sanchez, Jefferson Lerma, Jose
Izquierdo, James Rodriguez, Abel Aguilar, Mateus Uribe, Juan Fernando Quintero noJuan Guillermo Cuadrado.
Abagadli: Radamel Falcao, Miguel Borja, Carlos Bacca noLuis Fernando Muriel.
IPoland yase-Europe:
IPoland akukuningi okulindeleke kuyona njengoba sekuphele iminyaka engu-12 igcine ukubamba iqhaza kwiNdebe yoMhlaba. Izokube idlala ihlandla lesikhombisa kwiNdebe yoMhlaba. IPoland imandla kakhulu ekuhlohleni amagoli. Iqede iqhwakele kwiGroup E emidlalweni yokuhlunga. Ibihlohla amagoli sengathi iyabukisa kule midlalo. Nokho-ke inenkinga yokuvuza emuva njengoba ibe yizwe elingenelwe ngamagoli amaningi kwaqede eqhwakele e-Europe. Leli lizwe ligabe kakhulu nguRobert Lewandowski weBayern Munich yaseGermany. IPoland ilolongwa nguAdam Nawalka obengumdlali ogqamile wakuleliya lizwe kwiNdebe yoMhlaba ngo-1978. IPoland iteketiswa ngeleThe White and Reds. Isikwati sePoland esiya kwiNdebe yoMhlaba sididiyelwe kanje, onozinti: Bartosz Bialkowski, Lukasz Fabianski noWojciech Szczesny. Abasemuva: Jan Bednarek, Bartosz Bereszynski, Thiago Cionek, Kamil Glik, Artur Jedrzejczyk, Michal Pazdan noLukasz Piszczek.
Abasesiswini: Jakub Blaszczykowski, Jacek Goralski, Maciej Rybus, Piotr Zielinski, Karol Linetty, Grzegorz Krychowiak, Kamil Grosicki, Slawomir Peszko noRafal Kurzawa.
Abagadli: Robert Lewandowski, Arkadiusz Milik, Lukasz Teodorczyk noDawid Kownacki.
IJapan yase-Asia:
IJapan izokuya kulo mqhudelwano iqhutshwa ngu-Akira Nishino ongumqeqeshi oqashwe sekusele izinyanga ezimbili kuqale lo mqhudelwano. Ungene endaweni kaFranco-Bosnian Vahid Halilhodzic okhonjwe indlela ngenxa yokuphikwa yimiphumela nokungezwani nabadlali abathile. UFranco ubengahoshelani nabadlali asebemnkantshubomvu baseJapan. Kubona kubalwa uKeisuke Honda, uShinji Kagawa noShinji Okazaki. Laba badlali usebabuyisile uNishino, futhi ubabophelile emidlalweni yobungani. IJapan izokube idlala ihlandla lesithupha kulo mqhudelwano. Igabe ngabadlali abagijima kumaligi ahlonishwayo emhlabeni. UNishino unesipiliyoni esibambekayo njengoba bekunguyena obeqhuba isikwati seJapan kumaOlympic Game ngo-1996 e-Atlanta. Nguyena futhi lo mqeqeshi obesebhentshini leGamba Osaka ifinyelela kuma- semi final eFifa Club World Cup ngo-2008. IJapan iteketiswa ngele-Blue Samurai. Sesisonke isikwati seJapan esiya kwiNdebe yoMhlaba sididiyelwe kanje, onozinti: Eiji Kawashima, Masaaki Higashiguchi noKosuke Nakamura. Abasemuva: Yuto Nagatomo, Tomoaki Makino, Wataru Endo, Maya Yoshida, Hiroki Sakai, Gotoku Sakai, Gen Shoji noNaomichi Ueda. Abasesiswini: Makoto Hasebe, Keisuke Honda, Takashi Inui, Shinji Kagawa, Hotaru Yamaguchi, Genki Haraguchi, Takashi Usami, Gaku Shibasaki noRyota Oshima. Abagadli: Shinji Okazaki, Yuya Osako noYoshinori Muto.