UGIJIMELE UBALA OWASE-RUSSIA

UBALISE ngosizi abhekene nalo u-Alexandra Morozova waseRussia ophume isithathu esigabeni sabesifazane kwiComrades Marathon ebiyizolo ngeSonto isukela eMgungundlovu yasongwa eMoses Mabhida Stadium, eThekwini.

Lo msubathi uneke usizi lwakhe lokungayitholi imali yokuphuma isibili ngonyaka odlule. Abasubathi baseRussia banezinkinga ngenxa yezidakamizwa. Lo msubathi uthi ngabe uzama ukuhlenga impilo kanina oxinwe yisifo sikashukela ngale mali athi kumele ayinikwe yi-Athletics South Africa (ASA) eholwa ngu-Aleck Skhosana. Uthi izwe lakhe kalikwazi ukumsiza njengoba linenkinga elibhekene nayo. Nokho uthi usenalo ithemba lokuxazululwa kwale nkinga.

UMorozova uthi unqume ukukhuza ibuya nonyaka ngoba ezokusubatha ziyingxenye enkulu yempilo yakhe. UGerda Steyn obebhekwe ukudla ubhedu kulo mjaho, ungene endaweni yesibili. Ubethishwa ukunqoba ngemuva kokudla ubhedu kwiTwo Oceans Marathon ngePhasika. Intambo ishaywe ngu-Ann Ashworth. UTanith Maxwell ungene endaweni yesine, kanti bekuvele kulindeleke ukuba enze kahle.

UCharne Bosman uqede endaweni yesihlanu kwathi uSophia Sundberg walala endaweni yesithupha. UDevon Yanko ungene endaweni yesikhombisa kanti uSara Bard wangena kweyesishiyagalombili. UCarl Molinara ungene endaweni yesishiyagalolunye. UYolande Maclean waba ngoweshumi.

USkhosana ephawula ngodaba lukaMorozava uthe lo mgijimi ngeke akhokhelwe. Uthi lo mgijimi akaveli ohlwini lwe-IAAF lwabasubathi abavumelekile ukubamba iqhaza emijahweni yamazwe omhlaba. Uthi bamangele ukuthi uwungenele kanjani lo mjaho. Uthi bakholwa wukuthi ubezozijimela nje.

“Sinalo uhlu lwabasubathi abavunyelwe yi-IAAF ukubamba iqhaza emijahweni. Kalikho igama lalo mgijimi. Lokhu-ke kuchaza ukuthi ngeke simkhokhele ngoba sizokube siphambana nomthetho wenhlangano esilawulayo. Phela singaxoshwa kwezokugijima emhlabeni uma senza okuphambene,” kusho uSkhosana.

UChris Fisher oyiMenenja-jikelele kwiCMA, uthe bona balandela imiyalelo ye-ASA kukho konke