Iyaqina ekaHlatshwayo neBucs
UKhoza uzohlangana neWits ngalesi sitobha
I-ORLANDO Pirates, okungenye yamakilabhu athathwa njengamakhulu e-Afrika, izama ngawo wonke amandla ukuqinisa udonga lwayo lwasemuva njengoba kuvela ukuthi yeshela uThulani “Tyson” Hlatshwayo oyisiqongqwane seBidvest Wits neBafana Bafana.
IPirates isigxekwe kakhulu ngabalandeli bayo ngokuvuzisa emuva. Nakuba iqede isizini eyedlule isingconywana kodwa bekucaca ukuthi inkinga ayikelapheki ngokugcwele.
Leli phephandaba lithole ngemithombo yalo ukuthi uSihlalo wePirates, uDkt Irvin “Iron Duke” Khoza, uzibambele mathupha izinto njengoba efuna ukuba ezakhe zinqobe isicoco seligi ngesizini ezayo.
Kuthiwa umatasa neWits ufuna imdedelele uHlatshwayo ongukaputeni wayo. Kuvela ukuthi namuhla ngoMsombuluko uKhoza uzokuba nomunye umhlangano neWits ngodaba lukaHlatshwayo.
“Ubudlelwano bukaKhoza neWits buhle kabi njengoba besanda kuhwebelana ngoBrighton Mhlongo osezovimbela iWits.
"UKhoza njengamanje ufuna uthuli uHlatshwayo ngoba uyakhala ngodonga lwasemuva, phambili akaboni nkinga.
"Nokho okuningi kuzocaca lingakapheli leli sonto ngoba akafuni kuqale imidlalo yeNdebe yoMhlaba ingaqediwe indaba yokusayiniswa kwabadlali,” kusho umthombo wethu oncikene kakhulu nePirates.
UKhoza ebuzwa ngalolu daba, uthe: “Abalandeli bethu mabehlise amaphaphu, kukhona vele izinguquko esiza nazo cishe ezinye zazo sizozimemezela lingakapheli leli sonto uma konke kuhambe ngokwezinhlelo zethu.
"Kasifuni ukuxhamazela, sizama ukuthola abantu abazoyifuqa le nqola.”
Ubudlelwano bukaKhoza neWits buhle kabi njengoba besanda kuhwebelana...