USUTHU LUQINISA AMAXHAMA NAMAKILABHU ASE-ENGLAND
AMAZULU FC asezinhlelweni zokwakha ubungani namakilabhu agijima kwi-English Premiership ukukhulisa igama lale kilabhu emhlabeni.
ULunga Sokhela ( osesithombeni) oyisikhulu esiphezulu soSuthu, utshele ILANGA ese-United Kingdom (UK) ukuthi kumqoka ukuba bazise amakilabhu ase-England ngale kilabhu enomlando omude ebholeni lakuleli. Uthi ukuba nobudlelwano obuhle namakilabhu ase-England kuzobeka uSuthu esimweni esihle emhlabeni.
“Lokhu kungenza kube lula nokuhwebelana ngabadlali. Kumqoka ukuba nekilabhu (yase-England) esinobudlelwano obuhle nayo okungayinika negunya lokuba ngeyokuqala ukubheka esikhungweni sethu sokuthuthukiswa kwabadlali nxa kukhona ebadingayo.
"Singakwazi nokuboleka abagadli abathile ukuqinisa iqembu lethu. Nakuba kungekho osekusayiniwe okwamanje kodwa nginethemba njengoba nginamakilabhu amaningi engicubungula ukusebenzisana nawo,” kusho uSokhela ngalolu hambo olubizwa nge- Invest Durban Trip abonga ngalo umasipala weTheku.
Uthi ngoLwesine nangoLwesihlanu bazokuba seNkantolo eNkulu yaseGoli ukuphikisana nesinqumo sikaAdv Mokhari SC esikhahlelele uSuthu ngaphandle kwe- top 8. Uthi abammeli boSuthu sebekwenze konke futhi ukholwa wukuthi bazophumelela.
“Sifuna ukuba kujeziswe i-Ajax Cape Town (ngokudlalisa uTendai Ndoro engabhalisiwe ngokugcwele) kodwa thina singathelwa ngamachaphazelo esingahlangene nawo,” kusho uSokhela.
Uzeseka ngokuthi sekuke kwenzeka phambilini ukuthi ikilabhu enecala iphucwe amaphuzu bese etshingwa esikhotheni anganikwa izimbangi.
Uqhube ngokufisela indlela enhle uDarian Wilken obehlaziyela uSuthu imidlalo njengoba esejoyine i-Orlando Pirates.
Uphethe ngokuthi abadlali boSuthu bazoqala ukucijela isizini ezayo ngoMsombuluko womhla ka-18 kwephezulu.