I-ANC izibulala yona ngezinkantolo
MHLELI: Ngizwakalisa umbono wami mayelana nokumiswa kwengqungquthela ye-ANC KwaZulu-Natal (ebiseBhekuzulu Hall, KwaDlangezwa, eMpangeni).
IKwaZulu-Natal iyisifundazwe ongafunga ukuthi sabulawa yiqili maqede lazifel; zonke izinto ezingakhi ziqala kulesi fundazwe. Lokhu okwenzekile kucacisa ngokusobala ukuthi i-ANC izibulala yona ngoba kusho ukuthi njalo uma kukhona ukungaboni ngasolinye, kuyiwa ezinkantolo.
Uma i-ANC yehluleka ngo-2019, ingakhali ngamuntu, izisole yona. Kungase kuqhubeke ukubulawa kosopolitiki emuva kwalesi sivimbelo senkantolo ngoba uzokhumbula ukuthi izifunda ebezingeyona ingxenye yengqungquthela - okubalwa kuzona iHarry Gwala, iMoses Mabhida neSouth Coast lapho kwabulawa khona abantu - kusolakala ukuthi bezingahambisani nokuba khona kwayo.
Kube yiphutha elikhulu okwenziwe ngamalungu e-ANC ukuyisa iqembu enkantolo ekubeni linabo ubuholi obuphezulu. Kusho ukuthi i-ANC iphethwe yizinkantolo.
Iqembu lisuke selizifake enkingeni uma lithembele kakhulu ezinkantolo, ngisho noma bethi bajezisa ilungu lombutho, livele liye enkantolo, isibonelo;- iDA, ixakwe yilungu layo uPatricia de Lille.
Iqembu lithi i-ANC izophuma kanjani kulolu taku ezifake kulona ngoba phela yona kayisenawo amandla? Abaholi be-ANC mabayikhiphe ezinkantolo, abahluliwe bakwamukele lokho ngoba izofa iphele nya.