KUBULAWE ABANGANI BACWIYWA BAGQITSHWA
Bebeziphilisa ngokudayisa izingubo zokulala nobhavu
KUNOKWESABA emalungwini omphakathi waseKranskop, emuva kwesigameko sokubulawa kwabesilisa ababili maqede kwacwiywa izidumbu zabo, ezitholwe zigqitshwe emgodini ongashoni, zinqunu.
ILANGA lithole ukuthi uMnu Jabulani Maphumulo wasePretoria noMnu Tatenda Gazvivnga waseZimbabwe, babulawe ngabantu abangaziwa. Kuthiwa bebedayisa izingubo zokulala nobhavu bokugeza eKranskop, kodwa behlala eGingindlovu.
Bekunezinsuku ezithile abebeya ngazo eKranskop beyodayisa. Kubikwa ukuthi abasolwa bathathe yonke imali abafi abesebeyisebenzile ngoMsombuluko, bathatha nomakhalekhukhwini babo basebeyababulala, bagqiba izidumbu zabo endaweni eyibanga elincane nalapho bedayisela khona.
UMnu Dickson Gazvivnga, ongumfowabo kamufi, utshele ILANGA ukuthi bathole ucingo ngoMsombuluko ebusuku luvela entombini yomfowabo, ibazisa ukuthi akatholakali ocingweni lwakhe, luvaliwe.
Uthe imtshele ukuthi nolomngani wakhe adayisa naye luvaliwe kanti sesishaye sadlula isikhathi avame ukubuya ngaso uma eyodayisa. Uthe babesebephuma inqina beyobheka ngalapho umfowabo nomhlobo wakhe bejwayele ukuyodayisa ngakhona.
Utshele ILANGA ukuthi abantu babatshele ukuthi bahambe ngesikhathi esijwayelekile endaweni abadayisela kuyona, behamba ngemoto yabo.
Balandele umkhondo okuthe besendleni bazithela phezu kwesicathulo somfowabo. “Eduze kwendawo esithole kuyona isicathulo bekunehlathi. Singene kulona leli hlathi sabona imoto yakhe ipakiwe.
“Ebangeni elingekude nalapho bekukhona imoto, siqaphele ukuthi kunengqumba yenhlabathi obekubonakala ukuthi yintsha,” kusho uMnu Gazvivnga.
Uthe bafonele amaphoyisa ngokushesha okuthe uma kumbiwa kwatholakala isidumbu somfowabo nesomngani wakhe zinqunu, kunezitho zomzimba esezicwiyiwe.
Eceleni kwalapho bebegqitshwe khona uthe bekunobhavu babo sebeshisiwe. Uveze ukuthi umfowabo nomngani wakhe sebenesikhathi baqala ukudayisa kule ndawo futhi amalungu omphakathi abebazi njengoba bebedume nangokuthi bayawakweletela amakhasimende abo, akhokhe ngokuphela kwenyanga.
“Sibuhlungu ngendlela abulawe ngayo umfowethu nomngani wakhe ekubeni bebesiza umphakathi, bewudayisela izinto ozidingayo ngemali encane,” kusho uMnu Gazvivnga.
Uqhube wathi umfowabo ubenomuzi eGingindlovu, ubeya ngokuyodayisa eKranskop, afike khona ahlale izinsuku ezimbili noma ezintathu bese egoduka.
Utshele ILANGA ukuthi abantu besebemazi endaweni njengoba bebezazi nezinsuku afika ngazo uma eyodayisa.
UMnu Jabu Maphumulo, ongumfowabo omdala kamufi - ongumngani kaMnu Gazvivnga - uthe umfowabo obeziphilisa ngokudayisa, ubesebenza ngokubambisana nabokufika isikhathi esiningi.
“Sithole ucingo lusazisa ukuthi ubulawe ngabantu abangaziwa nomngani wakhe, besingakabi nayo imininingwane egcwele ukuthi bekwenzenjani," kusho uMnu Maphumulo.
ULt Col Thembeka Mbhele okhulumela amaphoyisa KwaZuluNatal, uthe kutholakale izidumbu ezimbili zabesilisa zigqitshwe emgodini ongashoni. Amaphoyisa avule amacala amabili okubulala, bekungakaboshwa muntu.