LIHOXISIWE ELOBESOLWA NGOKUBULALA UMZUKULU
Ilihoxisile icala iNkantolo yeMantshi eMtubatuba kowesifazane (62) obesolwa ngokubulala umzukulu wakhe. ILANGA libike kabanzi ngalolu daba ngoNdasa (March) ngesikhathi uNkk Ntombebovu Mdletshe eshaqwa ngamaphoyisa esemzini wakhe phambi komndeni wakhe ngecala abesolwa ngalo lokubulala uGamelihle “Gamo” Mdletshe (3)
Ubengaphandle ngebheyili ka-R1 500 ngemuva kokubhadla izinsukwana ejele. Ubevele enkantolo ngoLwesibili lapho efike khona icala lahoxiswa ngenxa yokuthi ubufakazi obebubekwe phambi kwayo kabumhlanganisi necala.
UGamelihle kubikwe ukuthi unyamalale mhla ka-10 kuZibandlela (December) ngonyaka ophelile. Kwabikwa ukuthi uphume ekhaya eyodlala, elandela izingane zakubo ezindala kunaye, akaphindanga wabuyela kubo.
Izingane zakubo zibuye zodwa okuthe uma zibuzwa, kwacaca ukuthi kazimbonanga ngesikhathi ezilandela. Laze lashona lelo langa ingane ingatholakali, isidumbu sayo saze satholakala ngemuva kwezinsuku ezintathu, sintanta emfuleni iNyalazi.
Phambilini ILANGA lithole ngemithombo yalo ukuthi kulolu daba lokubulawa kukaGamo, bekusolwa nenduna yendawo, uMnu Mdumiseni Mantenga. Leli phephandaba likhulumile nenduna ngesikhathi kusanda kuboshwa uNkk Mdletshe yazihlangula, yaveza ukuthi ibisiwazwile amahlebezi okuthi iyathinteka kulolu daba.
Ngesikhathi ILANGA likhuluma noyise wengane uMnu Sibusiso Mdletshe kusanda kuboshwa unina, umphikele walala ngomhlane unina ukubeni ubengabulala indodana yakhe, wakucacisa ukuthi uyameseka njengoba eboshiwe futhi akafuni ngisho ukucabanga ukuthi uyathinteka kulolu daba ngoba uyamazi umbulali.
Wathi ngisho kungaphuma siphi isinqumo enkantolo ngezinsolo ezibhekiswe kunina, bazomeseka ngoba bayazi ukuthi akayena umbulali. ILANGA liphinde lakhuluma noMnu Mdletshe emuva kokuhoxiswa kwecala likanina, uthe:
"Besivele sazi ukuthi umama akanacala, amaphoyisa aseMtubatuba abezama ukusidida imiqondo ngoba evikela abasolwa,” kusho uMnu Mdletshe.
Okhulumela amaphoyisa KwaZulu-Natal, uCol Thembeka Mbhele, ukuqinisekisile ukuhoxiswa kwecala likaNkk Mdletshe.