USEQALILE UKUZILOLONGA "OWASAHWA" UMLENZE
USEQALILE ukuzihambela ngaphandle kwezinduku umdlali ongumbhukudi, umsubathi nomshovi wamabhayisikili uMhlengi Gwala (26), ohlaselwe yizigilamkhuba ngoNdasa (March) zamsaha imilenze ngesikhathi ezilolonga ngase-University of KwaZulu-Natal.
Ngenhlanhla kayinqamukanga. Emasontweni amabili edlule uMhlengi uphindele esibhedlela iSt. Augustine's, eThekwini lapho ehlinzwe khona okokugcina, wavulwa idolo kwafakwa insimbi emgudwini womnkantsha ukuze kusekeleke ithambo lomlenze.
Ngesikhathi ehlaselwa, usizwe wukuthi isaha belibuthuntu kanti kuzoqhamuka unogada waseUKZN izigilamkhuba zisambhudukeza. Ungeniswe esibhedlela opha ngendlela eyisimanga.
Odokotela abebekhuluma bebelahla ithemba bethi le nsizwa kubonakala kuzothatha isikhathi eside ukuba ilulame, bashintshe ukukhuluma ngenyanga edlule bebabaza indlela alulama ngayo ngokushesha.
ILANGA likhulume noMhlengi izolo ngoLwesithathu ngesikhathi ephuma ukuyoqaqwa izitishi, uveze ukuthi ujabule kakhulu ngendlela alulama ngayo.
“Sengiqalile ngiyazilolonga, sengibuyele nasebhayisikilini noma kungelona leli langaphandle. Ngesonto elizayo ngizobe sengibuyela emanzini ngiziqeqeshe khona,” kusho le nsizwa yaseNdwedwe.
Iveze ukuthi isebenza noGerald Rudolph, oyiBiokenesis okunguye oyilekelelayo njengoba eyiqeqesha.
“Phambilini bengihamba ngezinduku ezingilekelelayo, kodwa manje sengiyakwazi ukuzihambela ngezinyawo zami zombili, yize ngisaxhuga. Njengamanje sengibheke ekubeni nglulame ngokugcwele, ngibuyele emsebenzini nasekuzilolongeleni imijaho,” kusho uGwala.