ISEXWAYISO KWELAKULELI NGENGOZI KWEZOMNOTHO
ININGIZIMU Afrika yexwayiswe yi-International Monetary Fund (IMF) ngokuthi umnotho wayo ungase ungakhuli udlule ku-2% esigabeni sesibili sonyaka ngenxa yongabazane kubatshalimali, oludalwa yindaba yokuthathwa komhlaba ngaphandle kwesinxephezelo nokushaya ngolonwabu kwezinguquko kwezomnotho.
Ikusho lokhu esitatimendeni esiphume ngoLwesibili. I-IMF ithe ukubeka zonke izinto obala mayelana nendlela ezosetshenziswa ukuthatha umhlaba ngaphandle kwesinxephezelo, kungasiza ukuqeda itwetwe kubatshalimali.
“Imigomo esobala mayelana nezinqumo nezinguquko ezamukeleke kubo bonke abantu, futhi ezingaxwaywa yizimakethe endabeni yomhlaba, kungasiza ukuqeda ukunqikaza kwabatshalimali,” kusho i-IMF.
Iqagula ukuthi umnotho wakuleli ungase wenyuke ngo-1.5% kulo nyaka. Ngenyanga edlule inhlangano ekala izinga lomnotho emazweni ehlukene, iStandard & Poor, ixwayise ngokuthi izolehlisa izinga (lomnotho) wakuleli uma ukuthathwa komhlaba ngaphandle kwesinxephezelo kukhombisa ukuphikisana nenjabulo yabatshalimali nesimo somnotho.
Kulindeleke ukuba i-IMF ikhiphe omunye umbiko wayo ngasekupheleni konyaka, lapho kuzocaca khona ukuthi iNingizimu Afrika, ibheke eweni noma iqombola umango.
Le nhlangano ikhuluma kanjena nje, isematheni indaba yokuthathwa komhlaba ngaphandle kwesinxephezelo emuva kokuba kube ngesinye sezinqumo ezithathwe engqungqutheleni ye-ANC ebiseNasrec, eGoli ngoZibandlela (December) nyakenye.
I-ANC iyithamunda eNasrec nje, i-EFF besekukudala iyikhuluma le ndaba yokuhlwithwa komhlaba. Lokhu kufake amanzi emadolweni, ikakhulukazi kubalimi abamhlophe.
Indaba yomhlaba iphinde yanyakazisa iSilo samaZulu, uZwelithini kaBhekuzulu njengoba kunethimba le-ANC ebeliholwa nguMnu Kgalema Motlanthe, eliphakamise ukuba kuqedwe nya ngeNgonyama Trust eyengamele izindawo ezingaphansi kwamakhosi.
ISilo silokhu sisho njalo sithi siyachukuluzwa kanti ngoMsombuluko emhlanganweni namakhosi obusezindlini zesishayamthetho esidala oNdini, siveze ukuthi sifuna ukuyoxoxa noMengameli Cyril Ramaphosa ngalolu daba.