Bafuna ubulungiswa abazali
Lngane yabo iphume esibhedlela iphuke ingalo
UBHODLA umlilo umndeni waseNtshawini, KwaDukuza, osola abahlengikazi basesibhedlela saseStanger ngokuphuka kwengalo yengane yawo ngesikhathi ibelethwa ngoNdasa (March) nonyaka.
UNkz Zanele Majola, ongunina kaZiyanda ( osesithombeni), uthi ufuna babhekane nomthetho laba bahlengikazi.
Ngokuthola kweLANGA, ngesikhathi uZiyanda esanda kuzalwa, unina uqaphelile ngesikhathi esezophuma esibhedlela ukuthi kukhona okungahambi kahle njengoba ingalo yakhe yesokunxele beyilenga, ingasebenzi.
UNkz Majola uthi akanakho ukungabaza ukuthi ingane yakhe ilimale ezandleni zabahlengikazi.
Uthi ingane kayilali ebusuku, usola ukuthi isuke izwa izinhlungu. Ngaphandle kwalokhu, uthi nangosuku abelethe ngalo akazange athole impatho enhle kubahlengikazi njengoba bebemthethisa besho nokuthi bazomshaya.
“Ngelanga engibelethe ngalo, ngifike ngisezinhlungwini eziyisimanga, abahlengikazi engibafice khona kabazange bangiphathe kahle neze. Kuthe sekumele ngiphume esibhedlela sebengilethela ingane, ngayibona ukuthi inenki- nga engalweni. Ngibize omunye umhlengikazi ngamkhombisa, naye wabona ukuthi kukhona okungahambi kahle, wangiyalela ukuba ngilinde udokotela ozoyibheka.
“Ufikile udokotela wayihlola, wathola ukuthi iphukile. Kungethusile lokhu ngoba ngesikhathi ingane ngiyibeletha ibingenalutho. Akekho ophumele obala ukuthi lokhu kwenzeke kanjani.
“Udokotela ungiyalele ukuba ngihlale ukuze bezobheka isimo sayo nomonakalo ukuthi ungakanani,” kusho yena.
Uthi kuhambe isikhathi wadedelwa nengane, ungekho umehluko engalweni yayo.
Utshele ILANGA ukuthi atshelwe khona nje, wukuthi ayihambi- se kwi-physiotherapist.
UMnu Lungani Ntuli onguyise kaZiyanda, uthi isimo sendodana yakhe siyamkhathaza kakhulu ngoba isifana nekhubazekile. Uthi ngisho ilele ngesisu, uma izimelela ngesandla, sivele siziphendukele sibheke emuva.
“Ngiyasola ukuthi isibhedlela sifuna ukubalekela iqiniso njengoba sebethi ingane izalwe ivele ilimele, okuphambene nokushiwo ngudokotela oyibhekile ngesikhathi isanda kuzalwa," kusho uMnu Mduli.
Okhulumela uMnyango wezeMpilo KwaZulu-Natal, uNkz Ncumisa Mafunda, uthe: “Umnyango ungakuqi- nisekisa ukuthi abazali baceliwe ukuba babuyisele isiguli esibhedlela ngoNcwaba (August) lapho sizobonwa khona ngongoti ekulashweni kwabantwana. Abazali bomntwana banelungelo lokuxhumana nesibhedlela nganoma yisiphi isikhathi uma kukhona abafuna ukuchazelwa ngakho‚" kusho yena.